Արցախյան պատերազմի մասին «Չեզոք գոտի» ֆիլմը կրկին կցուցադրվի Հայաստանում

Արցախյան պատերազմական իրադարձություններին անդրադարձող «Չեզոք գոտի» գեղարվեստական ֆիլմը արտասահմանյան պրեմիերաներից հետո կրկին կցուցադրվի Հայաստանում: Մարտի 19-ին հրավիրված ասուլիսում գլխավոր դերակատարներից Նվեր Գալստյանը հայտնեց, որ ֆիլմը հայ հանդիսատեսի դատին ներկայացվել է առաջին անգամ 2013 թվականի հունիսի 24-ին, սակայն «Ոսկե ծիրան» փառատոնի անցկացման պատճառով մեծ էրկրանին է եղել ընդամենը մեկ շաբաթ:

«Մեծ պրեմիերա եղավ, սակայն ընդամենը մեկ շաբաթ մնաց կինոթատրոնում, ինչը քիչ էր, որպեսզի հանդիսատեսը հասցներ դիտել այն»,- ասաց Գալստյանը:

Նա տեղեկացրեց, որ առաջիկայում արտերկրում' մասնավորապես Կրասնոդարում, կազմակերպվելու են ֆիլմի փակ դիտումներ, իսկ ստացված հասույթը փոխանցվելու է զոհված ազատամարտիկների ընտանքիներին:

«Այս որոշումը պատահական չէ, քանի որ ֆիլմը նվիրված է զոհված ազատամարտիկների ընտանքիների հիշատակին»,-ընդգծեց բանախոսը:

Մարտի 20-27-ն ընկած ժամանակահատվածում «Չեզոք գոտին» ցուցադրվելու է Երևանի «Cinema star» կինոթատրոնում, որից ստացված հասույթը փոխանցվելու է դերասան, Արցախյան պատերազմի ազատամարտիկ Կարեն Մկրտչյանին' բուժման նպատակով:

Առաջիկայում բացառված չէ նաև ֆիլմի ցուցադրությունը սահմանամերձ զորամասերում, Տավուշի մարզի Այգեձոր և Չինարի գյուղերում և հեռուստատեսությամբ:

«Շատ կցանկանայի, որ ազատամերտիկներն այսօր զրույցներ ունենան մեր շարքային զինվորների հետ, դրա կարիքն իսկապես կա»,- հավելեց Գալստյանը:

Գեղարվեստական ֆիլմը, նախքան հայրենիքում կրկին ցուցադրվելը, հանդիսատեսի դատին է ներկայացվել Դոնի Ռոստովում:

«Դոնի Ռոստովում ևս ֆիլմը ջերմ ընդունելության արժանացավ, սակայն Ռուսաստանի դաշնությունում ունեցանք խնդիր, մենք պետք է ՌԴ մշակույթի նախարարության կողմից ունենայինք լիցենզիա այն ցուցադրելու համար, որը մենք նույնպես ձեռք բերեցինք»,- պատմեց դերասանը:

«Լոս Անջելես պրոդաքշն» ընկերության տնօրեն Վիկ Միրզոյանն ասաց, որ Միացյալ Նահանգներում ֆիլմի անդրանիկ ցուցադրությունը կայացել է 2014 թվականի հունվարին:

Առաջիկայում ծրագրվում է ցուցադրություններ կազմակերպել ԱՄՆ-ում:

«Չեզոք գոտի» ֆիլմում ներկայացված է, թե ինչպես է 1994 թվականին չորս հոգուց բաղկացած հայկական հատուկ ջոկատը գնում է հայ գերիներին ազատագրելու: Անհասկանալի պատճառներով ջոկատը ազատագրված գերիների հետ չեզոք գոտում հայտնվում է շրջափակման մեջ, որտեղ հանդիպում են իրենց ընկերոջը, ով նրանց միանում է սեփական նախաձեռնությամբ եւ, տարածքին լավ ծանոթ լինելով, ուղղորդում է նրանց դեպի սահման: Հաղթահարելով տարբեր խոչընդոտներ' հայ զինվորականները վերջապես մտնում են Հայաստանի տարածք: Անցնում են տարիներ: Նախկին դեսանտագրոհայինն արդեն աշխատում է Ներքին գործերի նախարարությունում' գլխավորելով հատուկ նշանակության բաժինը: Պատահաբար մի հանցագործության հետաքննության ընթացքում դուրս է գալիս իր նախկին ընկերոջ հետքի վրա, ով չեզոք գոտին անցնելու ժամանակ եկել էր իրենց օգնելու: Նա պարզում է, որ զինընկերը տեղյակ է իրենց շարքերում դավաճան լինելու մասին, ով էլ կազմակերպել էր տարիներ առաջվա չարաբաստիկ օպերացիան, սակայն ամեն ինչ այնպես չէր ընթացել, ինչպես ինքն էր նախանշել: Հատուկ ջոկատի տղաներն իրենց մարտունակության եւ պատրաստվածության շնորհիվ իրականացրել էին գործողությունը եւ վերադարձել: Մարտական ընկերը դավաճանին պատժելու համար այլ ելք չի գտնում, քան վրեժխնդիր լինելը:

Հետաքննությունը կանգնում է խնդրի առաջ: Մինչ քննարկվում են ձերբակալության մանրամասները, ինչ-որ մեկը սպանում է դավաճանին:

Ֆիլմի նկարահանվել է Վանաձորում, Երեւանում, տարբեր այլ վայրերում: Ֆիլմի նկարահանմանն աջակցել են ՀՀ պաշտպանության նախարարությունը, ՀՀ ոստիկանությունը, Երեւանի քաղաքապետարանը: Նախկինում «Չեզոք գոտի»-ն ունեցել է «Չղջիկներ» աշխատանքային անվանումը: