ՀՀ-ում ծայրահեղ աղքատության շեմից ցածր կենսաթոշակ ստացող անձանց թիվը կրճատվել է հինգ անգամ

Հայաստանում 2014 թվականի հունվարի 1-ից կենսաթոշկների բարձրացման արդյունքում ծայրահեղ աղքատության շեմից ցածր կենսաթոշակ ստացող անձանց թիվը կրճատվել է հինգ անգամ՝ 68 հազարից դառնալով 12 հազար 800: Այդ մասին ՀՀ կառավարության նիստում, ՀՀ վարչապետ Տիգրան Սարգսյանի խնդրանքով ներկայացնելով արդյունքները, նշեց ՀՀ աշխատանքի և սոցիլական հարցերի նախարար Արտեմ Ասատրյանը:

«Աղքատության ստորին գծից ցածր գտնվող կենսաթոշակառուների թիվը նախորդ տարի կազմել է 230 հազար, այս տարվա բարձրացման արդյունքում այդ թիվը կրճատվել է 40 տոկոսով՝ կազմելով 138 100 անձ: Աղքատության վերին շեմից ցածր գտնվող կենսաթոշակառուների թիվը նախորդ տարի կազմել է 330 հազար, իսկ բարձրացման արդյունքում այսօր կազմում է 292 հազար անձ: Թիրախավորված բարձրացումն էապես նվազեցրեց աղքատության մակարդակը»,- ընդգծեց նախարարը: Վերջինս հիշեցրեց, որ ընթացիկ տարվա բյուջեով կենսաթոշակների բարձրացմանն ուղղվել է 29 մլրդ դրամ:

Վարչապետ Տիգրան Սարգսյանը նշեց, որ թեև բարձրացումը դեռևս շոշափելի չէ, բայց այն շոշափելի փոփոխություններ է մտցրել կառավարության ծախսային հատվածում:

«Հասկանալի է, որ բարձրացումները դեռևս շեշափելի չեն' մանավանդ հաշվի առնելով այն հանգամանքը, որ այս տարի աննախադեպ ցուրտ ձմեռ էր, և մեր քաղաքացիները ստիպված եղան ավելի շատ էլեկտրաէներգիա և գազ ծախսել, քան նախորդ տարի, և այս բարձրացումները հիմնականում ուղղվելու են այդ վճարներին: Սակայն դրանք, այնուամենայնիվ, շոշափելի փոփոխություններ են, եթե դիտարկենք մեր ծախսային հատվածներում»,- ասաց վարչապետը:

Վարչապետն ընդգծեց, որ կառավարությունը շարունակելու է այս ռազմավարությունը՝ դիտարկելով այն որպես աղքատության կրճատման արդյունավետ գործիք: