ՀՀ մարզերում շտապ օգնության տրանսպորտային միջոցներով ապահովման խնդիր կա

ՀՀ մարզերի շտապօգնության ծառայությունում տրանսպորտային միջոցներով ապահովվածությունը դեռևս հեռու է ցանկալիից: Այս մասին լրագրողների հետ հանդիպմանն ասաց ԱՆ աշխատակազմի արտահիվանդանոցային բժշկական օգնության քաղաքականության բաժնի պետ Ռուզաննա Յուզբաշյանը: Նրա խոսքով, խնդիրն ակնառու է հատկապես այն մարզերում, որտեղ բուժհիմնարկների գերակշիռ մասը նոր մեքենաների հետ մեկտեղ օգտագործում է նաև հին' դեռևս խորհրդային տարիներից մնացած մեքենաները: «Շտապ բժշկական օգնության արդիականացման ծրագրի» կատարման ընթացքում ձեռք են բերվել շտապօգնության մեքենաներ, որոնք հատկացվել են Կոտայքի, Արարատի, Արմավիրի, Տավուշի, Սյունիքի, Արագածոտնի մարզերի բուժհաստատություններին»,-ասաց նա:

Յուզբաշյանի խոսքով, 2011-ին Չինաստանի Ժողովրդական Հանրապետության կառավարությունը Հայաստանի Հանրապետությանը նվիրաբերել է 20 ռեանիմոբիլ և 68 գծային շտապօգնության մեքենա' հագեցված անհրաժեշտ սարքավորումներով:

Շտապօգնության տեղեկատվական-վերլուծական համակարգը մշակող խմբի ղեկավար Սևակ Մինասյանը նշեց, որ 2013 թվականին 2012 թվականի համեմատությամբ շտապօգնության կանչերն աճել են 23000-ով: «Աճի միտումը բացատրվում է առավել որակյալ և արդյունավետ աշխատանքով»,-ասաց նա:

Մինասյանի խոսքով, մեքենաների մեջ տեղադրված պլանշետների միջոցով բրիգադները կստանան կանչի թերթիկի էլեկտրոնային տարբերակը: «Այսպիսով թղթային աշխատանքի ծավալը կփոխարինվի էլեկտրոնային տարբերակով»,- հավելեց Շտապօգնության տեղեկատվական-վերլուծական համակարգը մշակող խմբի ղեկավարը:

Շտապօգնության ծառայության արդիականացման նպատակով մշակվել և ՀՀ կառավարության 2010 թվականի հուլիսի 10-ի N 894-Ն որոշմամբ հաստատվել է «Շտապ բժշկական օգնության արդիականացման ծրագիրը», որի գործարկումը նախատեսվել էր 2010, իսկ ավարտը' 2014 թվականին: