Երևանում մեկնարկում է Շեքսպիրյան 11-րդ փառատոնը

Գիտություն և Մշակույթ 20 Մարտ, 2014 0:47

Վ. Փափազյանի անվան Շեքսպիրյան հերթական միջազգային փառատոնը նվիրվում է անգլիացի դրամատուրգ Վիլյամ Շեքսպիրի ծննդյան 450-ամյակին: Փառատոնի հանդիսավոր բացումը տեղի կունենա մարտի 19-ին, ժամը 19:00-ին Երևանի պատանի հանդիսատեսի թատրոնում' Վ. Շեքսպիրի «Լիր արքա» հայ-վրացական համատեղ ներկայացման առաջնախաղով: Փառատոնին մասնակցելու համար Երևան են ժամանել Շեքսպիրյան փառատոնների եվրոպական ցանցի տնօրենները' Անգլիայից, Լեհաստանից, Գերմանիայից, Հունգարիայից, Ռումինիայից, Իսպանիայից, Չեխիայից, Դանիայից: Մարտի 19-ին լրագրողների հետ հանդիպման ժամանակ ՀՀ մշակույթի փոխնախարար Ներսես Տեր-Վարդանյանն ու Հայաստանի թատերական գործիչների միության նախագահ, փառատոնի տնօրեն Հակոբ Ղազանչյանը խոսեցին փառատոնի ընթացքում ծրագրված ներկայացումների և սպասվող արդյունքների մասին: «Փառատոնն արդեն ունի տասից ավելի տարվա պատմություն և այդ ընթացքում Հայաստանում են հյուրընկալվել երեսունից ավելի երկրների մասնակիցներ' մոտ վաթսուն թատերախմբեր»,- ասաց ՀՀ մշակույթի փոխնախարար Ներսես Տեր-Վարդանյանը և հավելեց, որ փառատոնը Հայաստանի համար կարևորվում է միջազգային համագործակցության տեսանկյունից առաջին հերթին նրանով, որ փառատոնի արդյունքում առկա է մշտական գործող մի հարթակ, որտեղ ծնվում են նոր գաղափարներ, համագործակցության նոր մոդելներ, մեխանիզմներ և ծրագրեր: Այս առումով հատկանշական է, որ փառատոնը կրում է հենց Շեքսպիրի անունը, քանի որ նրա անվան հետ են կապվում Հայաստանում ոչ միայն թատերական ներկայացումները, այլ նաև Շեքսպիրի գործերի ուսումնասիրության մեծ ավանդույթ կա և դրա վառ օրինակներից մեկն այն է, որ հրատարակչությունները վերահրատարակում են Շեքսպիրի գործեր:

Փառատոնի տնօրեն Հակոբ Ղազանչյանը նշեց, որ այս տարի փառատոնը նշելու յուրահատուկ ձև է ընտրվել: «Քանի որ Հայաստանի Շեքսպիրյան փառատոնը Շեքսպիրյան փառատոների ցանցի անդամ է, որոշեցինք ներկայացումները ցուցադրել փառատոների տնօրեններին»,- ասաց Ղազանչյանը՝ կարևորելով հետագա համագործակցության հնարավորությունը: Փառատոնը, ինչպես տեղեկացրեց բանախոսը, այս տարի կանցկացվի երկու փուլով. մյուս մասը կանցկացվի աշնանը, իսկ այս օրերս մեկնարկող հատվածը կկոչվի Շեքսպիրյան օրեր: «Նրա անունը անմիջական կապված է հայկական թատրոնի հետ: Հայ թատրոնի բո լոր մեծանուն դերասանները մնացել և հիշվել են իրենց խաղացած շեքսպիրյան դերերով: Շեքսպիրը հոգեհարազատ հեղինակ է մեզ համար»,- ասաց Ղազանչյանը:

Փառատոնը կտևի մինչև մարտի 22-ը: Փառատոնն անցկացվում է ՀՀ մշակույթի նախարարության աջակցությամբ և «Վիվասել-ՄՏՍ»-ի հովանավորությամբ: