Ազնավուրն անակնկալ կմատուցի Լեհաստանում բնակվող երաժշտասերներին

Ֆրանսահայ լեգենդար երգիչ Շառլ Ազնավուրը ելույթ կունենա Լեհաստանում: Ինչպես տեղեկացնում է Ազնավուրի ֆեսյբուքյան պաշտոնական էջը' համերգը տեղի կունենա մայիսի 7-ին` լեհական Լոձ քաղաքի Atlas Arena համերգասրահում: Youtube տեսահոսթինգում արդեն հայտնվել է համերգն ազդարարող տեսահոլովակը, իսկ տոմսարկղերն սկսել են համերգի տոմսերի վաճառքը:

Լեգենդար երգչի վերջին համերգը տեղի է ունեցել մարտի 15-ին` Թել Ավիվի «Նոկիա» համերգասրահում: Ազնավուրը համերգից առաջ մասնակցել էր Իսրայելում Ֆրանսիայի դեսպանի ընթրիքին, որտեղ հրավիրված էին նաև որոշ իսրայելցի երաժիշտներ: Իր կատարումներով Ազնավուրը ևս մեկ անգամ հիացրել էր տեղի ունկնդրին:

Նշանավոր ֆրանսահայ շանսոնյե, երգիչ, երգահան, կինոդերասան և հասարակական գործիչ Շառլ Ազնավուրը ծնվել է 1924 թվականի մայիսի 22-ին Փարիզում: Բազմաթիվ հայտնի գործերի հեղինակ և կատարող է: Վաճառվել է Ազնավուրի ստեղծագործություններն ամփոփող շուրջ 100 միլիոն ձայնապնակ: 2009 թվականից Ազնավուրը Շվեյցարիայում Հայաստանի դեսպանն է, ինչպես նաև Ժնևի ՄԱԿ-ի գրասենյակում և այլ միջազգային կազմակերպություններում Հայաստանի մշտական ներկայացուցիչը:

Այս տարի լրանում է անվանի գործչի 90-ամյա հոբելյանը, որի առթիվ աշխարհի տարբեր ծայրերում կկազմակերպվեն տոնական միջոցառումներ: Շատ երաժիշտներ կշնորհավորեն լեգենդար արվեստագետին'հոբելյանի կապակցությամբ: