Հայուհի Նենսի Նաջարյանն առաջադրվել է ԱՄՆ կոնգրեսականի թեկնածու

Ուժեղ համայնք, որակյալ աշխատատեղեր եւ միջազգային ստանդարտներին համապատասխան կրթություն: Ինչպես «Արմենպրես»-ին փոխանցեցին Նաջարյանի նախընտրական գրասենյակից, հենց այս խնդիրների լուծման նպատակով ամերիկահայ Նենսի Նաջարյանն առաջադրել է իր թեկնածությունը Վիրջինա նահանգի 8-րդ ընտրական տեղամասում: «Ցանկանում եմ ԱՄՆ Կոնգրես մտցնել այնպիսի հարցեր, որոնք վերաբերում են ամերիկահայ սովորական ընտանիքներին: Այդ խնդիրների թվում են իրավունքների մեծացումը, հնարավորությունների շրջանակների ընդլայնումը փոքր բիզնեսի համար, որպեսզի նրանք կարողանան զարգացնել իրենց բիզնեսը, երեխաների խնդիրներն ու կանանց առողջությունը նույնպես լուրջ հարցեր են: Այս առնչությամբ մեծ խնդիր են նաեւ անհավասար աշխատավարձը, կրթության մոտիվացիայի բարձրացումը»,- հայտարարել է Նաջարյանը

Նենսի Նաջարյանը ծնվել է Բոսթոն քաղաքում, կնքվել է հայկական եկեղեցում: Նենսին եւ ամուսինը' Մայք Սթիմսոնը իրենց երկու երեխաների հետ 1995թ. ապրում են Հյուսիսային Վիջինիայում: Նաջարյանի տատիկը Հայոց ցեղասպանության ականատեսներից է: Նա երբեք չի հրաժարվել հայկական արմատներից եւ միշտ պահպանել է կապը հայրենիքի եւ հայ համայնքի հետ: Նա եւ իր ընտանիքի անդամները աջակցություն են ցուցաբերել եւ մասնակցել 1988թ. Սպիտակի ավերիչ երկրաշարժից տուժածներին օգնելու համար բարեգործական միջոցառումներին: