Նրանց դուր է գալիս «1+ 4» ձևաչափը

«Հրապարակ» օրաթերթը գրում է. Կենսաթոշակային բարեփոխումների և կուտակային բաղադրիչի դեմ պայքարին «Հրապարակն» անդրադարձել է այդ պայքարի ծննդյան օրվանից: Չի եղել որևէ համար, որ մենք մեկ կամ երկու հոդված չունենանք: Լուսաբանել ենք և ակցիաները, և գործընթացը, հարցազրույցներ ենք արել ակտիվիստների հետ, գովել ու ողջունել այդ շարժումը: Բայց, պարզվում է, «Դեմ եմ»-ի երիտասարդները նեղացած են մեզնից: Օրերս արված մեր որոշ հրապարակումները «դուր չեն եկել» նրանց: Մասնավորապես, խոսքը Ժիրայր Սեֆիլյանի և Նիկոլ Փաշինյանի շուրջ ձևավորված իրավիճակին է վերաբերում: Հիշեցնեմ, որ «Դեմ եմ»-ն ուզում է ընդլայնել պայքարի շրջանակը և որոշել է նոր մարդկանց հրավիրել մարտի 22-ի միտինգին, այդ թվում՝ ոչ միայն վերը նշված երկու անձանց, այլև հասարակական շարժումների ներկայացուցիչներին, որոնք ելույթ կունենան հարթակից: Սակայն այս պայքարի երկրորդ էշելոնը՝ չորս ոչ իշխանական կուսակցությունները, դեմ են ընդլայնմանը: Նրանց դուր է գալիս «1+ 4» ձևաչափը: Նրանք ինքնադրսևորման ասպարեզ են ստացել և չեն ուզում այն կիսել այլոց հետ: Ահա այս մասին մեր հրապարակումները դուր չեն եկել կենսաթոշակայինի դեմ պայքարող երիտասարդներին, և նրանք բոյկոտ են հայտարարել «Հրապարակին», որոշել են չկարդալ և, առավել ևս՝ հարցազրույցներ չտալ: Մենք, անշուշտ, կդիմանանք այս ծանր հարվածին, բայց երկրի համար է սիրտներս ցավում»: 

Մանրամասները՝ թերթի այսօրվա համարում: