Արամ MP3-ը Երջանկության միջազգային օրվա առթիվ համերգ կտա

Երջանկության միջազգային օրվա առթիվ' մարտի 20-ին «Եվրատեսիլ-2014» միջազգային հեռուստատեսային մրցույթում Հայաստանի պատվիրակ Արամ MP3-ը համերգով հանդես կգա Երևանի «Մեցցո» երաժշտական ակումբում: Համերգի ընթացքում կհնչեն լավագույն հիթերի կենդանի կատարումներ:

Մեր երկրի պատվիրակը մրցույթում ներկայացնելու է «Not alone» երգը, որի խոսքերի հեղինակն է «Վիտամին» ակումբի անդամ, երգչի ընկեր Գարիկ Պապոյանը, երաժշտությունը գրել է ինքը' Արամ MP3-ը: Տեղադրվելով Youtube-ում` ընդամենը մի քանի օրերի ընթացքում երգչի տեսահոլովակը դիտվել է 697 հազար 656 անգամ: Տարբեր սոցիալական կայքերում ու ֆորումներում Արամ MP3-ը երգը դասվում է ֆավորիտների շարքին:

«Եվրատեսիլ 2014» 59-րդ ամենամյա մրցույթը տեղի կունենա Դանիայի մայրաքաղաք Կոպենհագենի B&W Hallerne սրահում: Մրցույթի կիսաեզրափակիչ փուլն այս տարի կկայանա մայիսի 6-ին և 8-ին, իսկ եզրափակիչը' մայիսի 10-ին: Հայաստանի պատվիրակ Արամ Mp3-ը ելույթ կունենա մայիսի 6-ին՝ 1-ին կիսաեզրափակիչ փուլի համերգային 1-ին հատվածում: Արամ Mp3-ը մրցույթին ընդառաջ տարեսկզբին ներկայացրեց շվեդական Մալմյո քաղաքում «Եվրատեսիլ 2013»-ի հաղթող դանիացի Էմիլիի «Only Teardrops» երգի իր մեկնաբանությունը: