Շուշիում կառուցվում է երեխաների խնամքի և պաշտպանության գիշերօթիկ հաստատություն

Ձմեռային դադարից հետո «Հայաստան» համահայկական հիմնադրամը վերսկսել է երեխաների խնամքի և պաշտպանության գիշերօթիկ հաստատության կառուցման աշխատանքները: Ինչպես «Արմենպրես»-ին տեղեկացրին հիմնադրամի մամուլի ծառայությունից, ֆինանսավորումն իրականացնում են հիմնադրամի պատվավոր անդամ Հրայր Հովնանյանն ու ԼՂՀ կառավարությունը:

Նորակառույցը կունենա նախադպրոցական և դպրոցական տարիքի երեխաների բնակության և ժամանցի համար ամհրաժեշտ բոլոր պայմանները' ննջարաններ, խաղասենյակներ, ճաշարան, համակարգչային դասասենյակ, գրադարան, հանդիսությունների սրահ: Ջեռուցման ու օդափոխության ժամանակակից համակարգերը տարվա բոլոր եղանակներին հարմարավետ պայմաններ ւ հաճելի միջավայր կապահովեն հաստատության բնակիչների համար: Կբարեկարգվի նաև բակը:

Արցախում ասյօր 1-ից 15 տարեկան մոտ 100 ծնողազուրկ երեխա է ապրում: Նրանցից 50-ը հանգրվանել է Ստեփանակերտի մանկատանը: Մնացած երեխաները ժամանակավոր օթևան են գտել հարազատների ընտանիքներում:

Ամերիկաբնակ հայ բարերար, հիմնադրամի Պատվո անդամ Հրայր Հովնանյանը Հիմնադրամի գործունեության ավելի քան 20 տարիների ընթացքում կարևորագույն ներդրու, է ունեցել կազմակերպության ձեռնարկներում: Առ այսօր, նա Հիմնադրամին' այն է հայրենիքին, նվիրաբերել է ավելի քան 15 միլիոն ԱՄՆ դոլար: