Ինչպես են կեղեքում հիվանդներին Հայաստանի հիվանդանոցներում. Դերոյի հերթական հակակոռուպցիոն իմիտացիան

ՀՀ առողջապահության նախարար Դերենիկ Դումանյանի մոտ քննարկվել է «Բժշկական ծառայությունների որակի բարելավմանն ու կոռուպցիոն ռիսկերի նվազեցմանն ուղղված միջոցառումների» իրականացման ընթացքը։

«2014-ի հունվարից մենք համակարգված միջոցառումներ ենք իրականացնում ոլորտում ստվերային վճարումների կանխման, կոռուպցիոն ռիսկերի նվազեցման ուղղությամբ»,-ասել է Դերենիկ Դումանյանը։ Չգիտես ինչու' մեծարգո Դերոն չի խոսել այն մասին, թե ինչու հենց 2014-ի հունվարից որոշեց սկսել կոռուպցիոն ռիսկերի նվազեցման համար մղվող պայքարը այն դեպքում, երբ իր նախարարական աթոռը վաղուց մաշվածքներ է ստացել սեփական հպումից:

Տարօրինակ է, չէ՞, որ հայաստանյան հիվանդանոցներում օրը ցերեկով բառիս ամենալայն իմաստով մաշկում են հիվանդների հարազատներին, իսկ նախարարը դեմքի լուրջ արտահայտությամբ ինչ-որ ծրագրերից է խոսում ու ռազմավարական ճոռոմաբանություններ է հրապարակում: Հատուկ ծրագրեր պետք չեն' մտնելու համար հիվանդանոցներ և տեսնելու, թե ինչպիսի բացառիկ լկտիությամբ ու ճանճի աներեսությամբ են ամեն քայլափոխի գումարներ պահանջում այն եզակի դժբախտներից, ովքեր ուղղակի ծայրահեղությունից դրդված դիմել են մեր հիվանդանոցներին' բուժօգնություն ստանալու համար: Առողջապահական ոլորտի պատասխանատուները մշտապես բողոքում են, որ հիվանդանոցները դատարկ են և գրեթե զբաղված մահճակալներ չկան. հավատացեք, դրա պատճառը ոչ թե սահմանված բարձր սակագներն են, այլ այն անմարդկային, զզվանք առաջացնող կոռուպցիան, որ ուղղակի կենսաձև է դարձել մեր բուժհաստատություններում: Եվ այսքանից հետո առողջապահության ոլորտի պատասխանատուները շարունակում են թիթեռ նկարել և լկտիաբար ստեղծել իմիտացիա, իբր պայքարում են կոռուպցիայի դեմ:

Բոլոր հոգեկան առողջության հետ խնդիրներ չունեցող մարդիկ շատ պարզ գիտակցում են, որ այս երևույթի արմատախիլ անելու համար կարող է պահանջվել առավելագույնը մեկ շաբաթ. մի քանի ակնհայտ հակակոռուպցիոն միջոցառումները և «քամակներին» ստացած մի քանի հարվածը բավական է, որ հասարակությանը կեղեքող այդ մանր-մունր «ժուլիկները» պարզապես դադարեն օգտվել մարդկանց դժբախտությունից: Հատկապես հաշվի առնենք, որ մեր երկրում կան բարեխիղճ աշխատող հիվանդանոցների հաջող օրինակներ, որոնք իրականացնում են տանելի սպասարկում: Վճարում ես սահմանված սակագինը և վերջ. մարդիկ նորմալ, բարեհամբույր իրականացնում են բուժական ծառայություններ' արգելելով հանձնել որևէ նվեր' անգամ կոնյակի տեսքով: Մինչդեռ բուժհաստատությունների մեծ մասում վճարում ես ավելի շատ, այնուհետև քերթվում եռակի, իսկ այնտեղից ազատվելուց հետո շտապում ուղիղ դեպի Էջմիածնի մայր տաճար' մազապուրծ լինելդ Բարձրյալի հետ կիսվելու համար...

Այնպես որ, տիկնայք և պարոնայք, դադարեցրեք հակակոռուպցիոն պայքարի իմիտացիան:

Գոնե պահպանեք քաղաքավարության տարրական կանոնները` ուտելիս չեն խոսում...

Վարուժան Բաբաջանյան