Ուկրաինան երբեք չի ընդունի Ղրիմի հանրաքվեի արդյունքները. Իվան Կուխտա

Ղրիմի հանրաքվեն տեղի է ունեցել Ուկրաինայի Սահմանադրության և միջազգային բոլոր նորմերի խախտմամբ, հետևաբար, Ուկրաինան երբևէ չի ընդունի Ղրիմի հանրաքվեն: Այդ առնչությամբ Հայաստանում Ուկրաինայի դեսպան Իվան Կուխտան հետաքրքրական համեմատություն արեց: «Իսկ դուք կհամաձայնե՞իք կամ ինչպե՞ս կվարվեիք, երբ որոշումը կայացվեր օրենքին և ձեր ցանկությանը հակառակ: Օրինակ, ձեզ ասեին, դուք իրավունք չունեք կիրակի տանից դուրս գալու կամ շաբաթ օրը ընդամենը մեկ ժամ ունեք զբոսնելու համար»,- մարտի 20-ին լրագրողների հետ հանդիպման ժամանակ ասաց Կուխտան: Շարունակելով համեմատությունների շարքը, դեսպանը, նշեց, որ Ղրիմի հանրաքվեն նման է այն իրավիճակին, երբ ասենք Երևանի մի փողոց, օրինակ Այգեձորը, որոշում կայացնի և դուրս գա Երևանի կազմից: «Որոշումները հենց այնպես չեն կայացվում, դրա համար գոյություն ունի Սահմանադրություն»,- մանրամասնեց Ուկրանիայի դեսպանը:

Կուխտայի խոսքով` Ուկրաինան պատերազմ չի ցանկանում, սակայն Ղրիմի կորստին համակերպվել էլ չի պատրաստվում: «Հենց այդ նպատակով էլ Ուկրաինան առաջարկում է նստել բանակցությունների սեղանի շուրջ` ինչպես Ղրիմի, այնպես էլ Ռուսաստանի Դաշնության հետ, քննարկել հարցերը: Ուկրաինան պատրաստ է մեծացնել Ղրիմի Ինքնավար Հանրապետության լիազորությունները, կարգավորել լեզվական հարցերը»,- ասաց դեսպանը: 

Կուխտան գնահատական չտվեց երկրի այլ շրջաններում տեղի ունեցող բողոքի ակցիաների և հանրահավաքների առնչությամբ: Նա միայն հավելեց, որ Ուկրաինան ժողովրդավար պետություն է և թույլ է տալիս հանրահավաքների և այլ միջոցառումների անցկացում, եթե դրանք չեն խոչընդոտում օրենքին:

Մարտի 16-ին Ղրիմում կայացած հանրաքվեի արդյունքում բնակիչների 96 տոկոսը կողմ է քվեարկել ՌԴ-ի հետ միավորմանը: Մարտի 17-ին ՌԴ նախագահ Վլադիմիր Պուտինը ստորագրել է հրամանագիր եւ ճանաչել Ղրիմի անկախությունը: Իսկ մարտի 18-ին ստորագրվել է Ղրիմի մարզի եւ Սեւաստոպոլ քաղաքի' ՌԴ կազմ մտնելու միջազգային համաձայնագիրը: Միջազգային հանրությունը չի ճանաչում Ղրիմի հանրաքվեի արդյունքներն ու որոշակի պատժամիջոցներ է կիրառում Ռուսաստանի դեմ: