Հայաստանի և Ուկրաինայի միջև վիզային ռեժիմ չի սահմանվի

Ուկրաինան չի ծրագրում Հայաստանի հետ վիզային ռեժիմ սահմանել: Հարցն Ուկրաինայի արտաքին քաղաքականության օրակարգում չկա, և նման խնդիր չի էլ քննարկվել: Մարտի 20-ին «Մեդիա կենտրոնում» կայացած հանդիպման ժամանակ Հայաստանում Ուկրաինայի դեսպան Իվան Կուխտան նշեց, որ պատճառներ չկան, որպեսզի հեռանկարում ներկայիս կարգը փոփոխվի:

Ուկրաինայի' ԱՊՀ կազմից դուրս գալու որոշումն էլ որևէ կերպ չի անդրադառնա հայ-ուկրաինական հարաբերությունների և վիզային ռեժիմի վրա: «Հայ-ուկրաինական հարաբերությունների առնչությամբ գոյություն ունի շուրջ 70 փաստաթուղթ, և դրանք թույլ կտան կարգավորել երկկողմ հարաբերությունները բոլոր ոլորտներում»,- ասաց Կուխտան:

Ուկրաինան որոշել է վիզային ռեժիմ սահմանել Ռուսաստանի հետ: Այդ առնչությամբ Ուկրաինայի արտաքին գործերի նախարարությունը Անվտանգության և պաշտպանության խորհրդի նիստի ժամանակ համապատասխան հանձնարարություն է տվել:

Դեսպանի գնահատմամբ` թեպետ կա համապատասխան որոշում, սակայն ընթացակարգն արագ չի լինի, քանի որ փաստաթղթերի ուսումնասիրման և փոխանակման անհրաժեշտություն կա:

Խոսելով ԱՊՀ կազմից Ուկրաինայի դուրս գալու որոշման վերաբերյալ` Իվան Կուխտան նշեց, որ անիմաստ է համարում անդամակցությունը մի կառույցի, որի անդամ երկրների արտաքին գործերի նախարարները չեն կարողանում ժամանակ գտնել խնդիրները քննարկելու համար: «Ի՞նչ է այդ կազմակերպությունը միայն թեյ ու սուրճ խմելո՞ւ համար է»,-ասաց դեսպանը:

Ուկրաինայում իրավիճակը սրվեց 2013թ. նոյեմբերի 30-ից հետո, երբ եվրոպական ինտեգրացիայի կողմնակիցները հավաքվեցին Կիևի կենտրոնական հրապարակում' Մայդանում և իշխանություններից պահանջեցին ստորագրել Եմ-ի հետ Ասոցացման համաձայնագիրը: Մի քանի ամիս տևած բողոքի ակցիաների արդյունքում հունվարին երկրում տեղի ունեցավ իշխանափոխություն, և իշխանության գլուխ եկան անձինք, ովքեր Ուկրաինայի ապագան տեսնում էին Եվրոմիության կազմում: Կիևի իրադարձությունները բուռն արձագանք գտան Ղրիմում: Մարտի 16-ին տեղի ունեցավ հանրաքվե, և բնակչության գերակշիռ մասը կողմ արտահայտվեց Ռուսաստանի հետ միավորվելուն: Այս ընթացքում ԱՊՀ ղեկավարությունը ստանձնած Ուկրաինան մի քանի անգամ դիմել է կառույցի արտաքին գործերի նախարարներին երկրում ստեղծված իրավիճակը քննարկելու համար, սակայն երկու անգամ նախանշված հանդիպումը տապալվել է: