Ղրիմի ղեկավարությունը հաղորդել է, որ սիմֆերոպոլցի հրաձիգը ձերբակալված է

Նախնական տեղեկատվության համաձայն՝ Արևմտյան Ուկրաինայի 17-ամյա մի բնակիչ է ձերբակալվել մարտի 19-ին Սիմֆերոպոլում հրաձգության համար, որի հետևանքով զոհվել է երկու մարդ: Այդ մասին հայտնել է Ղրիմի առաջին փոխվարչապետ Ռուստամ Տեմիրգալիևը:

«Ունենք հրաձիգի ձերբակալման մասին նախնական տեղեկատվություն: Նա Արևմտյան Ուկրաինայի 17-ամյա բնակիչ է»,- մարտի 20-ին «Ինտերֆաքսին» ասել է Տեմիրգալիևը:

Նրա խոսքով՝ քննիչները պարզում են՝ ձերբակալված պատանին ունեցել է արդյոք գործակիցներ, ինչպես նաև հանցագործության այլ հանգամանքներ:

Ավելի վաղ «Ղրիմինֆորմ» գործակալությունը հաղորդել է, որ Սիմֆերոպոլում մարտի 18-ին երկու մարդ է զոհվել, ևս երկուսը՝ տուժել դիպուկահարի կրակոցներից: Ղրիմի ՆԳ նախարարությունը ճշտել է, որ զոհվել են ինքնապաշտպանության ուժերի մի մարտիկ և ուկրաինական զորամասի մի զինծառայող: Վիրավորվել են նաև ինքնապաշտպանության ուժերի մի ներկայացուցիչ ու մի զինծառայող:

«Նախնական տվյալներով՝ կրակոցները կատարվել են նույն վայրից երկու ուղղությամբ: Անհայտ անձը զորամասի անմիջական մերձակայքում գտնվող կիսակառույց շենքի պատուհանից կրակել է ինքնապաշտպանության ուժերի ներկայացուցիչների վրա, որոնք ստուգում էին այդ շենքում զինված մարդկանց ներկայության մասին ազդանշանը, և հարևանությամբ տեղաբաշխված ուկրաինական զորամասի ուղղությամբ»,- նշվում է մամուլի տեղեկագրում: