Լյուդմիլա Սարգսյանի համար ոչ իշխանական ուժերի մեջ առանցք չկա

Ազգային ժողովի ՀԱԿ խմբակցության պատգամավոր Լյուդմիլա Սարգսյանը սխալ է համարում ոչ իշխանական չորս քաղաքական ուժերի մեջ առանցքային դերակատարի առանձնացումը: «Չորս ուժերի միավորման գործընթացի մեջ, չնսեմացնելով ԲՀԿ-ի դերակատարությունը, ես չէի առանձնացնի որևէ ուժին որպես առանցք, քանի որ բոլորս այդ գործընթացում կարևոր ենք ու առանցքային»,-ասաց պատգամավորը` շեշտելով, որ յուրաքանչյուր ուժ էլ ունի իր պատասխանատվությունը գործընթացի զարգացման և հասունացման առումով: «Եթե փորձենք ինչ-որ մեկին առանցք դարձնել, մյուսներին` ընդամենը կցորդ, ես կարծում եմ այստեղ կլինի մեր առաջին պարտությունը»,- հավելեց Լյուդմիլա Սարգսյանը:

Պատգամավորի կարծիքով` միասնական ծրագրի դեպքում մեծ հաջողությունների կհասնեն: «Ես կարծում եմ, որ իշխանության գալը ինքնանպատակ չպետք է լինի: Անհրաժեշտ է ունենալ մշակած ծրագիր, որի միջոցով կարելի կլինի տեսնել երկրի առաջընթացը»,-ասաց Լյուդմիլա Սարգսյանը` հավելելով, որ լուծումը նա տեսնում է անցումային կառավարություն ձևավորելու մեջ, որը կարևոր չէ, թե որ քաղաքական ուժը կղեկավարի:

Նշյալ գործընթացներում Լյուդմիլա Սարգսյանը կարևորեց ժողովրդի դերը, ովքեր պետք է գիտակցեն, որ կարող են ոչ միայն ընտրել իշխանություններին, նաև նրանց հեռացնել: «Շատ կարևոր է, որ ժողովուրդը գիտակցի, որ ոչ միայն կարող է ընտրել իշխանությանը, այլև վերահսկել ու հեռացնել նրանց»,-ասաց նա:

Համագործակցության նպատակով հանդիպումներ են տեղի ունենում Ազգային ժողովի ոչ իշխանական քաղաքական ուժերի միջև: Մարտի 11-ին տեղի է ունեցել «Բարգավաճ Հայաստան» և «Հայ ազգային կոնգրես» կուսակցությունների ներկայացուցիչների հանդիպումը: Դրան հաջորդել է «Ժառանգություն»-ԲՀԿ հանդիպումը: Իսկ խորհրդարանում քաղաքական ուժերի խմբակցությունների վերջին հանդիպմանը որոշել են մարտի 19-ին ներկայացնել իրենց հետագա գործողությունների ճանապարհային քարտեզը: Ի դեպ, ՀԱԿ առաջնորդ Լևոն Տեր-Պետրոսյանը մարտի 1-ի հանրահավաքի ժամանակ վճռական դե ր էր վերապահել ԲՀԿ առաջնորդ Գագիկ Ծառուկյանին և զուգահեռներ անցկացրել նրա եւ Վրաստանի նախկին վարչապետ Բիձինա Իվանիշվիլու միջև' նշելով. «թերահավատության անխուսափելի արձագանքներին միանգամից հակադարձեմ. ինչո՞վ է Ծառուկյանը պակաս Իվանիշվիլուց (ում հաջողվեց, շնորհիվ նաև Սահակաշվիլու խոհեմության, փափուկ իշխանափոխություն իրականացնել) կամ Ռենատ Ախմետովից ու Սերգեյ Տիգիպկոյից (ովքեր Յանուկովիչին թույլ չտվեցին արտակարգ դրություն հայտարարել Կիևում)»: Կարելի է կարծել, որ Լյուդմիլա Սարգսյանը չի կիսում այն քաղաքական ուժի ղեկավարի տեսակետը, որի ցուցակով ընտրվել է որպես պատգամավոր: