Հայրիկյանը «Ժառանգությունից» նեղացած` Ա.Խաչատրյանի արձանի մոտ հանրահավաքի իրազեկում է ներկայացրել քաղաքապետարան

Երևանի քաղաքապետարանն արտոնել է «Ազգային ինքնորոշում միավորում» կուսակցության առաջնորդ Պարույր Հայրիկյանի' մարտի 28-ին ծրագրված հանրահավաքը: Երևանի քաղաքապետի լիազոր ներկայացուցչի մարտի 20-ի որոշմամբ ի գիտություն է ընդունվել մարտի 28-ին' ժամը 16.00-17.30-ը, Երևանի Ա. Խաչատրյանի արձանի հարակից տարածքում հավաք, այնուհետև ժամը 17.3 0- 18.00-ն Ա. Խաչատրյանի արձանի հարակից տարածքից Սայաթ-Նովա պողոտա-Աբովյան փողոց-Հանրապետության հրապարակ-Նալբանդյան փողոց- Սայաթ-Նովա փողոց-Բաղրամյան պողոտա (չխոչընդոտելով երթևեկության բնականոն ընթացքը) երթուղով երթ անցկացնելու վերաբերյալ Պարույր Հայրիկյանի իրազեկումը:

Հայրիկյանը մարտի 20-ին երկու անգամ Ֆեյսբուքում հանրային գրառմամբ անհանգստություն ու տարակուսանք էր հայտնել, որ «Ժառանգությունը» մարտի 28-ի համար արդեն դիմել է քաղաքապետարան Ազատության հրապարակում հավաք անցկացնելու համար, սակայն չի կողմնորոշվել, թե ինչ ձևաչափով է այն անցկացնելու: «Պարզվում է' «Ժառանգությունը» դեռ չի կողմնորոշվել, թե ինչ է անելու, բայց մի հարց հստակ է' զբաղեցնել հրապարակը մարտի 28-ին ժամը 11-23-ը։ ԱԻՄ-ից մի քիչ շուտ են հայտ ներկայացրել և, այդ պատճառով իրենց համաձայնությունն է պետք ժամը 16:00-17:00-ի համար (երթի հարցում խնդիր չունենք): Չնայած մեզ տված իրենց խոստումին՝ հստակեցնել իրենց անելիքը և տեղեկացնել, ոչ իրենց անելիքն են հստակեցրել, ոչ էլ մեզ են հնարավորություն տալիս մարդկանց հստակ որևէ ժամ ասել 28-ին մեր ծրագրած հանրահավաքի մասին։ Մի քիչ էլ սպասենք, հետո թող ոչ ոք չնեղանա...»,-գրել էր Հայրիկյանը: