Շուշիից հեռարձակվող «Թալիշստանի ձայն» ռադիոկայանին հաջողվել է դառնալ թալիշ ժողովրդի խոսափողն աշխարհում

Արցախի Հանրապետության Շուշի քաղաքից 2013 թվականի մարտի 21-ից հեռարձակվող «Թալիշստանի ձայն» ռադիոկայանը նշում է գործունեության մեկ ամյակը: Մարտի 21-ին հրավիրված ասուլիսում ԵՊՀ իրանագիտության ամբիոնի վարիչ, իրանագետ, քրդագետ Գառնիկ Ասատրյանը, ամփոփելով ռադիոկայանի մեկամյա գործունեությունը, նշեց, որ «Թալիշստանի ձայն» պատմության մեջ առաջին թալիշական ռադիոյին հաջողվել է դառնալ թալիշ ժողովրդի խոսափողը աշխարհում: «Ռադիոկայանի աշխատանքի շնորհիվ' թալիշական շարժումը թևակոխել է մի նոր փուլ: Այն նպաստել է ոչ միայն թալիշների, այլև առհասարակ ազգային փոքրամասնությունների զարթոնքին»,- նշեց Ասատրյանը' տեղեկացնելով, որ «Թալիշստանի ձայնը» մեկ տարում հեռարձակել է 261 հաղորդում, ունեցել է մոտ կես միլիոն ունկնդիր:

«Ռադիոկայանը վկայում է հայերի հումանիստական ավանդույթների մասին, այն ունի նաև քաղաքական և պատմական նշանակություն»,- կարծիք հայտնեց իրանագետը:

«Թալիշստանի ձայն» ռադիոկայանի տնօրեն Գառնիկ Գևորգյանը, նշեց, որ ռադիոկայանի միջոցով առաջին անգամ Շուշիից հեռարձակվեցին հաղորդումներ թալիշերենով: «Տասնյակ տարիներ շարունակ Ադրբեջանը փորձել է ճնշել թալիշների ինքնությունը' նրանց ներկայացնելով որպես ադրբեջանցիներ, սակայն թալշիներն իրականում աշխարհում միլիոնավոր տարածում ունեցող ժողովուրդ են»,- ասաց Գևորգյանը: Նրա գնահատմամբ' հեշտ չեն կատարվել ռադիոկայանի առաջին քայլերը, սակայն կարճ ժամանակահատվածում լրացվել է փորձի պակասը, հաղթահավել են տեխնիկական խոչընդոտները: « Մեր ձեռքբերումներից մեկն այն է, որ Ադրբեջանում կոտրվեց թալիշ ժողովրդի առջև դրված տաբուն: Այժմ ազատ ժողովուրդը կարող է ինքնարտահայտվել»,- ընդգծեց ռադիոկայանի տնօրենը' հավելելով, որ ռադիոյին հաջողվել է դառնալ մշակութային յուրահատուկ, քաղաքական էլիտային համախմբող կենտրոն: Նա նաև հավելեց, որ «Թալիշստանի ձայն»-ը ստեղծել է աշխարհաքաղաքական բոլորովին նոր իրավիճակ, որը ապացուցում է հայ և թալիշ ժողովուրդների բարեկամության մասին:

«Թալիշստանի ձայն AM-9677» ռադիոկայանը բացառապես մասնավոր նախաձեռնություն է, չի ֆինանսավորվում որևէ պետական գերատեսչության կողմից: Նախագծի օպերատորն է «Իմպուլս» ռադիոընկերությունը (Երեւանում՝ Լրատվական Ռադիո FM 106,5):

Թալիշներն իրանական հնագույն ժողովուրդներից են, որոնք բնակվում են Ադրբեջանի հարավ-արեւելյան' Իրանին սահմանամերձ կասպիական շրջաններում (Լենքորան, Լերիկ, Մասալին, Աստարին, Յարդմիլին), նաեւ' Բաքվում եւ հարակից շրջաններում, ինչպես նաեւ Իրանի հյուսիս-արեւմտյան շրջաններում: Ադրբեջանի թալիշները շիադավան են, իսկ Իրանի թալիշները' սուննիադավան, նաեւ սուֆիական նակշբանդի ուղղության հետեւորդներ: