Հայաստանում Ուկրաինայի դեսպանը կանչվել է Կիև խորհրդատվության նպատակով

Ուկրաինան Կիև է կանչել Հայաստանում Ուկրաինայի դեսպան Իվան Կուխտային` խորհրդատվությունների համար: Ինչպես հաղորդում է ուկրաինական segodnya.ua կայքը, Ուկրաինայի ԱԳՆ տեղեկատվական քաղաքականության վարչության տնօրեն Եվգենի Պերեբիյնիսը մարտի 21-ին կայացած ճեպազրույցի ժամանակ հայտարարել է, որ Կիևը սպասում է Հայաստանի պաշտոնական դիրքորոշմանը` Ղրիմի հարցում: Ըստ ուկրաինական լրատվամիջոցների` Հայաստանի դեսպան Անդրանիկ Մանուկյանին հրավիրել էին Ուկրաինայի ԱԳՆ և նրան նոտա է հանձվնել:

Ուկրաինայի արտաքին գործերի նախարարությունը դիմել է Հայաստանին` խնդրելով բացատրել Ղրիմի վերաբերյալ երկրի պաշտոնական դիրքորոշումը: Այդ մասին մարտի 21-ին կայացած ճեպազրույցի ժամանակ հայտարարել է Ուկրաինայի ԱԳ նախարարի տեղակալ Դանիլ Լուբկիվսկին:

Մարտի 20-ին ուկրաինական ազգայնամոլական «Սվոբոդա» կուսակցության առաջնորդ Օլեգ Տյագնիբոկը Գերագույն ռադայի ամբիոնից կոչ էր արել հետ կանչել Հայաստանում ու Ղազախստանում Ուկրաինայի դեսպաններին: Մարտի 16-ին Ղրիմում կայացած հանրաքվեի արդյունքում բնակիչների 96 տոկոսը կողմ է քվեարկել ՌԴ-ի հետ միավորմանը: Մարտի 18-ին ստորագրվել է Ղրիմի մարզի և Սևաստոպոլ քաղաքի` ՌԴ կազմ մտնելու միջազգային համաձայնագիրը: