«Հրապարակ». Ստացվում է, որ այս իրավիճակից օգտվեց Հայաստանը

«Այն փոփոխությունները, որոնք տեղի են ունենում այսօր Եվրամիությունում, հնարավորություն են ստեղծում, որ Հայաստանը քաղաքական համաձայնագիր ստորագրի ԵՄ-ի հետ՝ որպես առանձին փաստաթուղթ»,- վարչապետ Տիգրան Սարգսյանի այս հայտարարությունը, որն արվեց Բրյուսելում, ԵԺԿ գագաթնաժողովից առաջ, նորություն չէ: Դեռեւս Վիլնյուսից առաջ Հայաստանն առաջարկել էր ԵՄ երկրներին Ասոցացման համաձայնագրից առանձնացնել քաղաքական մասը եւ ստորագրել այն:

Այն ժամանակ եվրահանձնակատար Ֆյուլեն նույնիսկ հայտարարեց, որ տնտեսական մասը քաղաքականից առանձնացնել չի կարելի, քանի որ սա մի ամբողջական փաթեթ է: «Կա՞ արդյոք ինչ-որ գործընթաց այս փաստաթղթի շուրջ» հարցին ԱԳՆ խոսնակ Տիգրան Բալայանն ասաց. «Եթե վարչապետը խոսում է, ուրեմն սրա շուրջ կոնկրետ գործընթաց կա»: Այնուամենայնիվ, ի՞նչը փոխվեց, ինչո՞ւ է այսօր Եվրոպան պատրաստ ստորագրելու այն, ինչը մերժում էր նախկինում: Վերլուծաբան Երվանդ Բոզոյանը ԵՄ դիրքորոշման փոփոխությունը կապում է ուկրաինական դեպքերի հետ՝ այն իրավիճակի, երբ ասոցիատիվ համաձայնագրի հետ կապված գործընթացի արդյունքում Ուկրաինան կորցրեց Ղրիմը եւ կանգնեց քաղաքացիական պատերազմի վտանգի առաջ:

«Այս երկրի վարչապետը հայտարարում է, որ դեռ ձեռնպահ պետք է մնալ եվրոպական ասոցացման համաձայնագրի տնտեսական մասից եւ ստորագրել միայն քաղաքական մասով, որովհետեւ տնտեսական մասի ստորագրումը վտանգում է Արեւելյան Ուկրաինայի արդյունաբերական պոտենցիալը: Նոր ուկրաինական իշխանությունները մեղադրում էին Յանուկովիչին այն բանի համար, որ նա ժամանակ էր շահում, որպեսզի կարողանա շարունակել բանակցությունները ԵՄ-ի հետ տնտեսական մասով: Մեծ հաշվով, հենց սրա համար իրեն իշխանությունից հեռացրին, եւ հիմա նոր իշխանությունները նույն բանն են ասում: Մի կողմ դնելով բարոյականության խնդիրը, պետք է ընդունենք, որ նա ելնում է իրականությունից, հաշվի առնելով, որ ԵՄ-ն Ուկրաինայի հետ համաձայնագիրն ստորագրեց միայն քաղաքական մասով: Ահա ինչու տրամաբանական է, որ նա ստորագրի նաեւ Հայաստանի մասով»:

Ստացվում է, որ այս իրավիճակից օգտվեց Հայաստանը, քանի որ ԵՄ-ի հետ քաղաքական մասով համաձայնագրի ստորագրումը նշանակում է, որ Հայաստանը պարտավորություն է վերցնում մի շարք ստանդարտների վերաբերյալ, ինչից մենք միայն շահում ենք:

Շարունակությունը` «Հրապարակ» օրաթերթի այսօրվա համարում: