Հրանտ Բագրատյանը պատրաստ է «տելեվիզորով կուկարեկու կանչել». «Դ!եմ եմ»-ի հանրահավաք

«Դ!եմ եմ» շարժման երիտասարդները ցանկանում են զերծ պահել իրենց շարժումն այս կամ այն քաղաքական ուժի կողմից սեփականաշնորհումից: Դա ակնհայտ է մարտի 22-ին Ազատության հրապարակում հրավիրված հանրահավքի ընթացքում: Չնայած երիտասարդները ելույթի համար խոսքը այս կամ այն քաղաքական ուժի ներկայացուցչին տալով հայտարարում էին, որ նրանք ՀՀ քաղաքացիներ են' առանց հնչեցնելու որևէ ուժի անուն, սակայն հարթակ բարձրացողները հատուկ ընդգծում են իրենց կուս ակցության անունը:

Ելույթ ունեցողների թվում էին Ազգային ժողովի ՀԱԿ խմբակցության պատգամավոր Նիկոլ Փաշինյանը, ԲՀԿ անդամ Վահան Բաբայանը, ՀՅԴ ներկայացուցիչ Արծվիկ Մինասյանը: Հարթակ բարձրացավ նաև Րաֆֆի Հովհաննիսյանը, ում ելույթը չընդունվեց նույնքան ոգևորությամբ, որքան այս կամ այն քաղաքական ուժը չներկայացնող երիտասարդների ելույթները: «Տղերք, աղջկերք, հաշվարկեք ու հաշվի առեք բոլոր ռեսուրսները' ավելի լավ, քան մենք արեցինք»,-ասաց Հովհաննիսյանը' ընդգծելով, որ շարժման մեջ ներգրավվողները պետք է լինեն հավասար:

Հրանտ Բագրատյանն առիթը բաց չթողեց պարտադիր կուտակային համակարգի հասցեին տարատեսակ գնահատականներ հնչեցնելու: Նրա խոսքով' 45 տարով ներդնելու գործիք աշխարհում չկա: «Նույնիսկ ՆԱՍԱ-ին, եթե մենք ֆինանսավորենք դեպի Մարս թռչող արբանյակը, 20 տարուց ավելի պարտք չեն տա: 45 տարվա պարտքը «նոնսենս» ա, Գինեսի ռեկորդ», -ասաց Բագրատյանը' հավելելով. «Ես այս ամբիոնից առաջարկում եմ կառավարությանն ու վարչապետին, թող ասեն, որ նման բան կա, աշխարհում, ես տելեվիզորով կուկարեկու (ծուղրուղու- խմբ.) կկանչեմ»:

Հանրահավաքի մասնակիցները վանաձորցի ակտիվիստի երեք րոպեանոց երաժշտական ստեղծագործությունը լսելուց հետո երթի դուրս եկան:

Հայաստանի Հանրապետությունում հունվարի 1-ից գործարկվում է կենսաթոշակային պարտադիր կուտակային համակարգը, ըստ որի' 1974 թվականից հետո ծնված քաղաքացիները կկատարեն 5 տոկոսի չափով պարտադիր վճարումներ' կուտակային հիմնադրամներին: Կենսաթոշակային համակարգի մասնակիցների գումարները կառավարվելու է ֆոնդի կառավարիչների միջոցով: «Դեմ եմ» նախաձեռնությունը պայքարում է պարտադիր բաղադրիչը չեղյալ հայտարարելու համար:

ՀՀ վարչապետ Տիգրան Սարգսյանը կառավարության մարտի 19-ի նիստին հայտնեց «Դեմ եմ»նախաձեռնության հետ երկխոսելու պատրաստակամություն: «Մենք հայտարարում ենք, որ ճիշտ ճանապարհը երկխոսության ճանապարհն է, և հրավիրում ենք մեր երիտասարդ գործընկերներին' «Դեմ եմ»շարժման ներկայացուցիչներին, այդ երկխոսությանը: Միևնույն ժամանակ, կարծում եմ, որ «կամ ամեն ինչ, կամ ոչինչ» սկզբունքից հրաժարվելն օգտակար կլինի բոլորի համար, և դա նշանակում է, որ նաև «Դեմ եմ» շարժումը պետք է վերաձևավորվի և դառնա շարժում' հանուն մեր երկրի ապագայի, հանուն բարեփոխումների, այնպիսի բարեփոխումների, որոնք կստանան մեր երիտասարդների աջակցությունը: Սա մեր ուղերձն է «Դեմ եմ» շարժման ներկայացուցիչներին»,- ընդգծել է վարչապետը: