Կամերային նվագախումբը կշնորհավորի Ռուբեն Ալթունյանի հոբելյանը

Հայաստանի պետական կամերային նվագախումբը համերգ կնվիրի կոմպոզիտոր, ալտահար Ռուբեն Ալթունյանին' նրա 75-ամյա հոբելյանի կապակցությամբ: Ինչպես «Արմենպրես»-ին տեղեկացրին Կամերային երաժշտության ազգային կենտրոնից, համերգը տեղի կունենա Կոմիտասի անվան կամերային երաժշտության տանը մարտի 29-ին: Երեկոյի ընթացքում նվագախումբը, գեղարվեստական ղե կավար և գլխավոր դիրիժոր Վահան Մարտիրոսյանի ղեկավարությամբ, հանդիսատեսին կներկայացնի Ռուբեն Ալթունյանի ստեղծագործությունները: Նվագախամբի հետ հանդես կգան նաև դուդուկահար Լևոն Թևանյանը և քամանչահար Հակոբ Խալաթյանը:

Կոմպոզիտոր Ռուբեն Ալթունյանը ծնվել է 1939 թվականին, Երևանում: Ավարտել է Չայկովսկու անվան միջնակարգ երաժշտական տասնամյա դպրոցի ջութակի բաժինը: Ուսանել է Երևանի Կոմիտասի անվան պետական կոնսերվատորիայում: 1974-1977թթ. աշխատել է Հավանայի կոնսերվատորիայում: 1983թ. ստեղծել և ղեկավարել է Հայաստանի Գուսանական և ժողովրդական երգի պետական անսամբլը: 1987-90 թթ. աշխատել է Հայաստանի Թ. Ալթունյանի անվան երգի և պարի պետական անսամբլում՝ որպես գեղարվետսական ղեկավար և գլխավոր դիրիժոր: 1969թ.-ից դասավանդում է ԵՊԿ-ում: Հեղինակ է բազմաթիվ կոնցերտների, 2 լարային կվարտետի, սիմֆոնիայի, ժողովրդական նվագարանների համար գրված ստեղծագործությունների, 120 ժողովրդական երգի և պարի, հոգևոր և հայրենասիրական երգերի մշակումների' տարբեր կազմերի համար, և բազմաթիվ այլ ստեղծագործությունների: Գրել է նաև երաժշտություն մուլտֆիլմերի և մանուկների համար: