Երկրապահը միասնական կառույց է. ազատամարտիկ

5-րդ բրիգադի ազատամարտիկ Օհան Գեւորգյանը վրդովված է, որ, ինչպես ինքն է ձեւակերպում. «Անհայտ, ուրիշի անվան տակ թաքնված մարդիկ համարձակվել են օրերս վայրահաչել իր հրամանատար, Արցախյան հերոսամարտի կենդանի լեգենդ Մանվել Գրիգորյանի հասցեին»:

«Արցախի հերոս Մանվել Գրիգորյանը մերօրյա ազատամարտի կենդանի խորհրդանիշերից է,- ասում է Օհան Գեւորգյանը եւ ավելացնում,- ես ազատագրական պատերազմին մասնակցել եմ Մանվել Գրիգորյանի հրամանատարությամբ: Նա, իր հայրենասիրությամբ եւ նվիրվածությամբ կարողանում էր քաջալերել, մարտի մղել բոլորիս: Նրա ղեկավարությամբ մենք բազում մարտական օպերացիաներ ենք պլանավորել եւ հաջողությամբ իրականացրել»: «Զորավարի համար թանկ էր ամեն մի զինվորի կյանքը, նա ամեն մեկիս խնդիրն իրենն էր համարում: Այսօր նրա հասցեին վայրահաչել, նշանակում է վիրավորել իր հրամանատարությամբ պատերազմած քաջ տղաներին, նշանակում է վարկաբեկել ԵԿՄ 40 000 անդամներին: Դա հազարավոր մեր զոհերին վարկաբեկելու փորձ է, մեր պատանի եւ երիտասարդ երկրապահներին վարկաբեկելու փորձ: Սա թուրքի ձեռագիր է, հայ ազգի թշնամու ձեռագիր: Փորձ են անում հարված հասցնել ամենաազգային, ամենահայրենասիրական կառույցին: չեն էլ գիտակցում, թե ինչ դաժան պատասխան կարող են ստանալ նշածս տասնյակհազարավոր անձանցից եւ նարնց ընտանիքներից: Այդ ինչպե՞ս եղավ, որ արտասահմաններում թաքնված մեկը կամ նրա անսկզբունք պատվիրատուները Արցախյան հերոսամարտի լեգենդար հրամանատարի անունը տալու իրավունք ստացան: Դա չի կարող հանդուրժվել մեր հանրության կողմից: Ես, նաեւ հարյուրավոր իմ մարտական ընկերներ, խստորեն զգուշացնում ենք' մի քիչ զգույշ եղեք մեծությունների մասին խոսելիս»,- ասում է Գեւորգյանը: «Զորավարի գործունեության արդյունքը մեր այսօրվա հզոր Հայաստանն ու պաշտպանված Արցախն են, իսկ ի՞նչ են արել հանուն Հայաստանի կամ հանուն իրենց ընտանիքների այդ զազրախոսները: Մի լավ բան այս երկրում արե՞լ եք, որ ձեզ իրավունք եք վերապահում մեծ-մեծ խոսել հերոսների մասին: Ես հպարտ եմ, որ գեներալի զինվորն եմ եղել»,- հավելում է Գեւորգյանը:

Օհան Գեւորգյանի կարծիքը հարցրինք նաեւ ԵԿՄ-ի' պառակտվածության շուրջ խոսակցությունների վերաբերյալ: Պատասխանը հետեւյալն էր. «Երկրապահը միասնական կառույց է: Ազատամարտի մասնակիցների բացարձակ մեծամասնությունը մեր շարքերում են: Իսկ այն տղաները, որ օբյեկտիվ կամ սուբյեկտիվ պատճառներով հեռացել են հարազատ օջախից, մի օր վերադառնալու են ընտանիք: Մենք հենց հիմա էլ ակտիվ աշխատանք ենք տանում այս ուղղությամբ: Զորավարը հստակ հրահանգել է, որ փորձենք համոզել, ընտանիք վերադարձնել ազատամարտի բոլոր մասնակիցներին: Հենց այս օրերին էլ անդամագրության բազում դիմումներ ունենք: Կան տղաներ, որ ցանկանում են զբաղվել քաղաքականությամբ: Մեր կառույցն, ինչ խոսք, քաղաքականությանը չի կարող խառնվել, կուսակցական խաղերին չի կարող մասնակցել: Մենք ունենք հստակ ուղղություն' պետության, երկրի կողքին ենք, զինված ուժերի գերագույն գլխավոր հրամանատարի կողքին ենք: Սա հասկացող մարդկանց ենք ասում, ով չի հասկանում' իր խնդիրն է»: