Մենք երկրապահ ենք, հո երկրաքանդ չենք. Աշոտ Խաչատրյան

Վերջին շրջանում Հանրապետական մամուլում առանձնահատուկ աշխուժություն է նկատվում ԵԿՄ գործունեության շուրջ: Հանրությանը հետաքրքրող մի քանի հարցերի վերաբերյալ Լուրեր.com-ը զրուցել է ԵԿՄ Արմավիրի մարզային խորհրդի նախագահ Աշոտ Խաչատրյանի հետ:

-Պարո՛ն Խաչատրյան, Ձեր մարզում ավարտվեցի՞ն ԵԿՄ հաշվետու ընտրական ժողովները: Ինչպե՞ս եք գնահատում Արմավիրի մարզային կառույցի աշխատանքները:

-Մեր մարզի բոլոր տարածքային բաժանմունքներն էլ ակտիվ աշխատում են: Բոլոր տարածքներում կայացած են նաեւ պատանի եւ երիտասարդ երկրապահների կառույցները: Ամենուր ժողովներն անցան տոնական մթնոլորտում: Ամենուր փոխանցվում էր Զորավար Մանվել Գրիգորյանի շնորհավորանքը ժողովների անցկացման, Սպարապետի ծննդյան 55-րդ տարեդարձի, պատանի երկրապահների երդման արարողության եւ գարնանային տոների' կանանց միամսյակի կապակցությամբ:

-Օրերս մամուլում անդրադարձ կար ԵԿՄ վարչության նախագահի վերաբերյալ, որում քննադատական խոսք էր հնչում: Երկրապահներն ի՞նչ են մտածում այս առիթով:

-Երկրապահ կամավորականների միությունը միասնական կուռ ընտանիք է: ԵԿՄ 40 000 անդամները, զոհվածների ընտանիքների անդամները, պատանի եւ երիտասարդ երկրապահները իբրեւ անձնական վիրավորանք են ընդունում Զորավարի հասցեին ասված ցանկացած խոսք: Մենք լավ ենք հասկանում, որ Զորավարին քննադատելով' հայ ազգի թշնամիները, թուրքերը կամենում են վարկաբեկել ԵԿՄ-ն, կամենում են արժեզրկել Սպարապետ Վազգեն Սարգսյանի ժառանգությունը, կամենում են թուլացնել այս համազգային հզոր կառույցը: Թույլ չենք տալու ամեն արժող, չարժողի, ամեն մի դիլետանտի վայրահաչել Երկրապահի հասցեին, մեր ընտանիքի ղեկավարի հասցեին:

-Կարծիքներ կան, որ ԵԿՄ-ն միասնական չէ, որ այդ կառույցում այսօր միայն այն ազատամարտիկներն են, ովքեր կցված են իշխանությանը:

-ԵԿՄ-ն միասնական է ավելի, քան երբեւէ: Ազատամարտի մասնակիցների 90 տոկոսից ավելին այսօր ԵԿՄ շարքերում են: Սակայն, մենք Զորավարի հրահանգով հանդիպում ենք նաեւ այն տղաներին, ովքեր ինչ-ինչ պատճառներով հեռացել են հայրենի օջախից: Փորձում ենք հարազատ օջախ վերադարձնել բոլոր ազատամարտիկներին: Կան այնպիսիք, որ երկրապահական խնդիրներից վեր են համարում քաղաքական հարցերով զբաղվելը: Խնդրեմ, իրենք են որոշողը: ՀՀ ցանկացած քաղաքացի էլ կարող է քաղաքականությամբ զբաղվել, կարող է իր նախընտրած քաղաքական թիմում լինել, բայց ԵԿՄ-ն թող չփորձեն խառնել իրենց խաղերին: Թող նման փորձ անելու համարձակություն չունենան: Երկրապահը բնականորեն պետության կողքին է, զինված ուժերի գերագույն գլխավոր հրամանատարի կողքին է: Բա էլ ո±ր դաշտում պետք է լինեն երկրապահները: Մենք կռվել ենք հանուն հայրենիքի, հանուն պետության, հիմա էլ կանգնած ենք երկրի, պետության կողքին: Մենք երկրապահ ենք, հո երկրաքանդ չենք:

-Օրերս Մանվել Գրիգորյանը կարծիք հայտնեց, որ Արցախի անկախությունն այլընտրանք չունի: Դա ողջ Երկրապահի± կարծիքն է:

-Զորավարը պատերազմի ժամանակ եւս անկախության խորհրդանիշ էր: Իհարկե, նա որպես ընտանիքի հայր, արտահայտել է բոլոր երկրապահների դիրքորոշումը: Մենք մեր երիտասարդությունը, ինչպես ասաց Մանվել Գրիգորյանը, նվիրել ենք հանուն Արցախի անկախության պայքարին, ընկերներ, հարազատներ ենք կորցրել եւ չենք կարող համակերպվել, որ Արցախն այլ կարգավիճակ ունենա, բացի անկախությունից կամ Հայաստանի կազմում ընդգրկվելուց: