Քեսապցի 250 հայեր տեղավորվել են Լաթաքիայի եկեղեցու սրահներում

Սիրիայի Քեսապ գյուղաքաղաքի հայությունը, որը հաստատվել է Լաթաքիա քաղաքում, գտնվում է ապահով վիճակում' հայ եկեղեցու և հայկական բարեգործական միությունների աջակցությամբ: Այս մասին ֆեյսբուքյան էջում գրառում է կատարել քեսապցի Վրեժ Գարամարտյանը: «Քեսապի վերաբերյալ ցանկանում եմ տեղեկացնել, որ մարդիկ վնաս չեն կրել: Ողջ բնակչությունը տեղափոխվել է Լաթաքիա: Մեծամասնությունը տեղավորվել է տներում, որովհետև շատերը հարազ ատներ ու տներ ունեն այստեղ: Մոտ 250 անձ տեղավորվել է եկեղեցու սրահներում: Լաթաքիայի բոլոր միություններն ու կազմակերպություններն աշխույժ գործի են անցել' ապահովելու կենցաղային բոլոր պայմանները: Լաթաքիայի տարբեր կազմակերպություններ, բարեսիրական միություններ, պետական հաստատություններ և անհատ բարերարներ են համախմբվել: Օգնող ձեռքերը շատ են, մի մտահոգվեք: Քեսապը պետք է վերականգնվի և քեսապցին պետք է ապրի»,-եզրափակել է նա:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսապ գյուղաքաղաքի վրա հարձակումը սկսվել է մարտի 21-ին Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: Տեղի Հայկական շտապօգնության մարմինը Սիրիայի Կարմիր մահիկ ի կազմակերպության հետ անհրաժեշտ պարագաներով և սնունդով ապահովել է բնակիչներին:

Մինչև 1947թ. ներգաղթը Քեսապի շրջանը եղել է ամբողջովին հայաբնակ։ Դրանից հետո Քեսապի բնակչության պատկերն սկսել է փոփոխվել։ Քեսապցիների' Հայաստան ներգաղթին զուգահեռ օտարազգիներն սկսել են հաստատվել այնտեղ։