Հայաշատ Քեսապը զինյալների հսկողության տակ է

Թուրք-սիրիական սահմանի մոտ գտնվող Քեսապ գյուղաքաղաքում մարտի 23-ին հսկողություն են հաստատել զինված խմբավորումների անդամները: Այս մասին տեղեկացրեց Քեսապի մեր աղբյուրը: Սիրիական բանակը հետ է քաշվել և պատրաստվում է հակահարվածի: Աղբյուրի տեղեկացմամբ, բարեբախտաբար, տեղաբնակ հայերն անվնաս տեղափոխվել են Լաթաքիա: 

«Ալ Մայադին» լիբանանյան կայքը տեղեկացնում է, որ Թուրքիայի կողմից պայթեցված սիրիական ռազմական օդանավն ընկել է Լաթաքիայի Բահլուլիա գյուղում: Կայքը նաև տեղեկացրել է, որ Քեսապի մուտքի մոտ արյունալի բախումներ են ընթացել մասնավորապես քաղաքի անձնագրային և վիզաների վարչության մոտ:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսապ գյուղաքաղաքի վրա հարձակումը սկսվել է մարտի 21-ին Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են «Ջաբհա ան Նուսրա» և «Ջեյշ ալ Իսլամ» խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում: 

Մինչև 1947թ. ներգաղթը Քեսաբի շրջանը եղել է ամբողջովին հայաբնակ։ Դրանից հետո Քեսաբի բնակչության պատկերն սկսել է փոփոխվել։ Քեսաբցիների' Հայաստան ներգաղթին զուգահեռ օտարազգիներն սկսել են հաստատվել այնտեղ։