Եվրահանձնակատար Ֆյուլեն մարտի 25-ին կայցելի Կիև՝ քննարկելու ԵՄ-ի հետ ասոցացման համաձայնագրի իրագործումը

Ընդլայնման և եվրոպական քաղաքականության հարցերով եվրահանձնակատար Շտեֆան Ֆյուլեն մարտի 25-ին երկօրյա այցով կժամանի Կիև՝ «քննարկելու Եվրամիության հետ ասոցացման համաձայնագրի քաղաքական մասի իրագործումը»: Այդ մասին հայտնում է itar-tass-ը:

Համաձայնագրի քաղաքական բլոկը, որը մարտի 21-ին Բրյուսելում ստորագրել են ԵՄ-ի երկրների ղեկավարները և Գերագույն ռադայի կողմից Ուկրաինայի վարչապետի պաշտոնում նշանակված Արսենի Յացենյուկը, 21 էջ է ներառում1378-ից (առանց հավելվածների ու արձանագրությունների): Դա կազմում է փաստաթղթի տեքստի ընդհանուր ծավալի ընդամենը 2 տոկոսը:

Եվրոպական ԶԼՄ-ների տեղեկատվության համաձայն՝ ԵՄ-ի հետ Ուկրաինայի ասոցացման մասին համաձայնագրի մնացած բաժինները, որոնք պլանավորվում է ստորագրել մայիսի 25-ին կայանալիք նախագահական ընտրություններից հետո, նվիրված են Եվրոպայի առևտրական օրենսդրությունը պահպանելու Ուկրաինայի պարտավորություններին:

Ինչպես արդեն հաղորդվել է, «Մեծ յոթնյակի» երկրների ղեկավարները և Եվրամիության նախագահը Հաագայում մեկնարկող միջուկային անվտանգության միջազգային գագաթնաժողովի շրջանակներում մարտի 24-ին կքննարկեն միասնական դիրքորոշումը Ուկրաինայի և Ղրիմի իրադրության նկատմամբ:

«Յոթնյակի» (ԱՄՆ, Մեծ Բրիտանիա, Գերմանիա, Ֆրանսիա, Իտալիա, Ճապոնիա, Կանադա) արտահերթ հանդիպման նախաձեռնողը ԱՄՆ-ի նախագահ Բարաք Օբաման է: Նա գործընկերներին առաջարկել է Ուկրաինայի իրադրությունը քննարկել «Յոթի խմբի» ձեւաչափով, որը պարբերաբար այդ կազմով հանդիպումներ է անցկացնում, չնայած այն բանին, որ 1998 թվականից նրանց միացել է Ռուսաստանը՝ ձևավորելով G8-ը: