«Ջազը և Գյումրին» նախագծի շրջանակում ելույթ կունենա AVA եռյակը

«Մանուկյան ընկերության» և Գյումրիի «Ջազ ակումբ»-ի նախաձռնությամբ իր ընթացքն է շարունակելու «Ջազը և Գյումրին» նախագիծը, որի շրջանակում AVA եռյակի համերգը տեղի կունենա ապրիլի 27-ին «Հոկտեմբեր» կինոթատրոնում: «Արմենպրես»-ի հետ զրույցում «Ջազը և Գյումրին» նախագծի համահիմնադիր Մկրտիչ Մանուկյանը նշեց, որ եռյակի կազմում են ջազային երաժիշտներ Արտո Թունջբոյաջյանը, Վահագն Հայրապետյանը և Արմեն Հյուսնունցը:

Արտո Թունջբոյաջյանը Armenian Navy Band խմբի հիմնադիրն է: 1998 թվականից խումբը կարողացավ նվաճել երաժշտասերների հարգանքը և սեփական նշանակալի տեղը զբաղեցնել երաժշտական աշխարհում: Ստեղծագործական գործունեության 7-8 տարվա ընթացքում անսամբլը ելույթ է ունեցել Եվրոպայի և Արևելքի գրեթե բոլոր երկրներում: Այն մասնակցել է տասնյակ միջազգային ջազ-փառատոնների, միևնույն բեմում ելույթ է ունեցել համաշխարհային ջազի ականավոր դեմքերի հետ:

ՀՀ վաստակավոր արտիստ «Կատուներ» հայկական էթնո-ջազ խմբի հիմնադիր Վահագն Հայրապետյանը հայկական ջազային երաժշտության ամենավառ ներկայացուցիչներից մեկն է, ով չի դադարում նոր «ջազային» գաղափարներ կյանքի կոչել:

ՀՀ արվեստի վաստակավոր գործիչ Արմեն Հյուսնունցը տարբեր տարիներ հանդես է եկել այնպիսի երաժիշտների հետ, ինչպիսիք են Չիկ Կորեան, Արմեն Դոնելյանը, Ջո Զավինուլը և այլք: 2010 թվականից Հայաստանի պետական ջազ-նվագախմբի գեղարվեստական ղեկավարն է: «Ջազը և Գյումրին» նախագիծը մեկնարկել է 2012 թ. նոյեմբերին: 2014 թվականի Նոր համերգաշրջանի առաջին համերգին մասնակցել են երգիչ Ֆորշը և «Ռե մինոր» բենդը: