Արարատի մարզում նախապատրաստվում են ոռոգման տարեշրջանին

Ոռոգման տարեշրջանին պատշաճ մակարդակով պատրաստվելու նպատակով' «Մասիս» ջուրօգտագործողների ընկերությունում (ՋՕԸ) ընթանում են միջտնտեսային և ներտնտեսային համակարգի մաքրման և վերանորոգման աշխատանքներ: Միջտնտեսային ոռոգման ցանցի 8,2 կմ հատվածում մաքրման աշխատանքներն ավարտվել են, իսկ ներտնտեսային 21,8 կիլոմետրից 16-ում դեռ շարունակվում է մաքրումը: Ինչպես «Արմենպրես»-ին տեղեկացրեց Արարատի մարզպետարանի աշխատակազմի հասարակայնության հետ կապերի բաժնի գլխավոր մասնագետ Քրիստինե Խաչատրյանը, միջտնտեսային համակարգի ոռոգման ցանցի 13,3 կմ հատվածն ամբողջությամբ մաքրվել է, իսկ ներտնտեսային համակարգի 68,4 կիլոմետրից մնում է մաքրելու 38-ը: Ավարտվել են նաև ջրհան և հիդրոտեխնիկական կայանների, խորքային և հորիզոնական պոմպերի, շատրվանող հորերի նորոգման աշխատանքները, դրանք պատրաստ են ոռոգման տարեշրջանին:

«Ազատ» ՋՕԸ-ում մաքրվել և նորոգվել է 45 կմ ներտնտեսային ցանցը: 150 կմ աշխատանքները կավարտվեն մինչև ապրիլի սկիզբը: Վերանորոգվել են 40 խորքային հորերից չորսը, շարունակվում են երեք պոմպակայանների ավազանի մաքրման աշխատանքները: Շուտով կավարտվի նաև Մխչյանի ջրհան կայանի 15 կմ հատվածի նորոգումը:

«Վեդի» ՋՕԸ-ում նույնպես մեծ թափով իրականացվում են ոռոգման տարեշրջանի նախապատրաստական աշխատանքները: Մաքրվել են ներտնտեսային ցանցի 70 տոկոսը և միջհամայնքային ջրատարների 90 տոկոսը:

Արարատի մարզի ոռոգման ջուր ապահովող հինգ ջուրօգտագործող ընկերություններից մյուս երկուսում' «Արտաշատ» ՋՕԸ-ում և «Արարատ» ՋՕԸ-ում այս պահին նույնպես տարվում են նախապատրաստական աշխատանքներ:

Լիլիթ Մաճկալյան