Խորհրդարանն ընդունեց «Պետական գույքի կառավարման մասին» օրենքի նախագիծը

Ազգային ժողովը քվեարկությամբ ընդունեց «Պետական գույքի կառավարման մասին» օրենքի նախագիծը: «Արմենպրես»-ի հաղորդմամբ՝ նախագծին կողմ քվեարկեց 62, դեմ՝ 42 պատգամավոր: ԱԺ նախագահ Հովիկ Աբրահամյանը քվեարկությունից առաջ տեղեկացրեց, որ նախագիծը քննարկել են խմբակցությունների ղեկավարների մասնակցությամբ և արձանագրել են, որ օրենքի նախագծում խնդիրներ կան: «Մենք պետք է դեռևս քննարկենք այս նախագիծը: Առաջինից երկրորդ ընթերցման ռեժիմում մենք անպայման կանդրադառնանք նախագծի խնդրահարույց դրույթներին»,- «Արմենպրես»-ի հաղորդմամբ՝ նշեց նա:

«Պետական գույքի կառավարման մասին» օրենքի նախագծի քվեարկությունից առաջ ՀԱԿ խմբակցության ղեկավար Լևոն Զուրաբյանը 20 րոպե ընդմիջում էր վերցրել՝ նշելով, որ իրենք մտավախություն ունեն, որ կարող են ընդունել մի օրենք, որը կհակասի Սահմանադրությանը: ԱԺ նախագահի մոտ խմբակցությունների ղեկավարների մասնակցությամբ կայացած խորհրդակցությունից հետո նախագիծը դրվեց քվեարկության:

Ազգային ժողովը մարտի 24-ին ավարտել էր «Պետական գույքի կառավարման մասին» օրենքի նախագծի քննարկումը:

Օրենքով նախատեսվում է կարգավորել պետական գույքի նպատակային եւ ծրագրային տնօրինման, տիրապետման եւ օգտագործման, այդ թվում հաշվառման, գնահատման, պետության սեփականության իրավունքի գրանցման աշխատանքների կազմակերպման, պետական գույքի շրջանառության, ինչպես նաեւ գույքի պահպանվածության ապահովման ու կառավարման նկատմամբ վերահսկողության իրականացման հետ կապված հարաբերությունները: Օրենքի գործողությունը չի տարածվում պետական սեփականություն հանդիսացող հողամասերի (բացառությամբ շենք, շինություններով զբաղեցրած եւ դրա սպասարկման համար հատկացված հողամասերի), ընդերքի, անտառների, մեկուսի ջրային օբյեկտների եւ պետությանը պատկանող այլ բնական պաշարների, պատմության եւ մշակույթի անշարժ հուշարձանների, ինչպես նաեւ Հայաստանի Հանրապետության կենտրոնական բանկի գույքի եւ Հայաստանի Հանրապետության կենտրոնական բանկի կողմից հիմնադրված կամ Հայաստանի Հանրապետության կենտրոնական բանկի մասնակցությամբ կազմակերպությունների վրա, պաշտպանական, սահմանային, քաղաքացիական պաշտպանության, ինչպես նաեւ ազգային անվտանգության բնագավառի պետական կառավարման լիազորված մարմնի տիրապետմանը եւ օգտագործմանը հանձնված պետական գույքի վրա, որն իր նշանակությամբ նախատեսված է գաղտնի աշխատանքների կատարման համար:

Օրենքի ընդունման անհրաժեշտությունը կայանում է նրանում, որ սեփականության իրավահարաբերությունների կառավարման ներկա փուլում օբյեկտիվ անհրաժեշտություն է առաջացել վերանայել պետական գույքի կառավարման, տնօրինման, տիրապետման եւ օգտագործման բնագավառում իրականացվող քաղաքականությունը, ուժեղացնել տնտեսության պետական գույքի կառավարման համակարգումն ու դրա վերահսկումը, մշակել տնտեսապես հիմնավորված հեռանկարային զարգացման ծրագրեր, ստեղծել կանոնակարգված ու գործուն մեխանիզմներ' պետական գույքի արդյունավետ կառավարում իրականացնելու հ ամար: Պետական գույքի կառավարումը՝ հանդիսանալով պետության կարեւորագույն իրավատնտեսական գործառույթներից մեկը, հիմնավորվածության տեսանկյունից դեռեւս չունի համակարգված օրենսդրական եւ նորմատիվային միասնություն: