Հայաստանում կովկասյան հովազի պահպանության ծրագիր է իրականացվում

Վայրի բնության եւ մշակութային արժեքների պահպանման հիմնադրամը անհետացման եզրին գտնվող կովկասյան հովազների պահպանության ծրագիր է իրականացնում: Ինչպես «Արմենպրես»-ին տեղեկացրին հիմնադրամից, կովկասյան հովազը գրանցված է ՀՀ կարմիր գրքում, ինչպես նաև ԲՄՊՊ միջազգային կարմիր գրքում: « ԲՊՄՄ (IUCN) տվյալների համաձայն, Հայաստանում կարող է առավելագույնը հանդիպել 13 հովազ, իսկ ամբողջ աշխարհում' առավելագույնը 1300»,-ասացին հիմնադրամից:

Կովկասյան հովազն անհետացումից փրկելու ծրագիրը քվեարկության է դրվել Եվրոպական բաց տարածքների պահպանության ասոցիացիայի (EOCA) կայքէջում: «EOCA-ն խրախուսում է տեղական և միջազգային բնապահպանական մեծ նշանակություն ունեցող նախաձեռնություններն ու իրականացումը: Այս առումով Վայրի բնության և մշակութային արժեքների պահպանման հիմնադրամի և իր գործընկերների կողմից իրականացվող ծրագրի հաջող արդյունքներն արժանացել են միջազգային ուշադրության և այսօր հավակնում են Գերմանիայի «Նեյշնլ Գեոգրաֆիկ»-ի կողմից հատկացվող մրցանակին' բնապահպան ության ոլորտում շոշափելի արդյունքների նվաճման համար»,-նշեցին Վայրի բնության եւ մշակութային արժեքների պահպանման հիմնադրամից' հավելելով, որ հայտ ներկայացրած բազմաթիվ ծրագրերից ընտրվել են միջազգային նշանակության 6 ծրագիր, որոնցից մեկը Հայաստանում կովկասյան հովազի պահպանության ծրագիրն է: Հաղթանակի դեպքում Հայաստանում իրականացվող ծրագիրը կստանա դրամական աջակցություն կովկասյան հովազի համար անհրաժեշտ տարածքների պահպանման և ընդլայնման համար:

Կովկասյան հովազի պահպանման ծրագիրն իրականացվում է 2012 թվականից, երբ առաջին անգամ ձյան վրա նկատվեցին հովազի առաջին ոտնահետքերը: Կենդանու մազափնջի գենետիկ ստուգումներն հավաստեցին, որ դրանք պատկանում են հովազին: Արդեն 2013 թվականին տեղադրված տեսախցիկներն երեք անգամ տեսագրեցին տարածքում բնակվող հովազին' սկզբից պոչը, հետո մարմինը և վերջում ամբողջ հովազը: Այս իրադարձությունների վերաբերյալ միջազգային հանրահայտ բրիտանական «Թայմս» պարբերականը տպագրել է երեք հոդված: