Դալտոնիզմ, քաղաքական իմպոտենտ. թեժ քննարկումներ` ԱԺ-ում

ԱԺ «Ժառանգություն» խմբակցության ղեկավար Ռուբեն Հակոբյանը իշխող մեծամասնության պատգամավորներին հորդորում է ընդդիմությանը խորհուրդներ, դասեր չտալ:

«Մտեք ընդդիմություն, հետո դասեր տվեք՝ ոնց անենք, թե չէ դասախոսություն եք կարդում՝ ընդդիմությունն ինչ է: Եվ ընդհանրապես, ընդդիմությանը դասեր մի տվեք, երբ կյանքում 15 րոպե չեք եղել ընդդիմությունում։ Զգույշ եղեք»,- ասաց Հակոբյանը:

Անդրադառնալով ՀՀԿ խմբակցության պատգամավոր Խոսրով Հարությունյանի երեկվա հայտարարությանը, թե ընդդիմությունը «սև ակնոց է հագել», ամեն ինչ սևացնում է, Ռուբեն Հակոբյանը նշեց, որ դա քաղաքական դալտոնիզմ է:

«Սև ակնոցնե՞ր է, որ մենք ասում ենք, որ մարտի մեկը պետք է բացահայտվի, որ ասում ենք՝ 300 մլն դոլարի պարտքը չպետք է ժողովրդի վզին դրվի: Գուցե դո՞ւք եք վարդագույն ակնոց դրել:

Ռուբեն Հակոբյանին պատասխանեց Խոսրով Հարությունյանը. «Չգիտեմ՝ ես դալտոնիկ եմ, թե չէ, բայց ընդդիմությունը քաղաքական իմպոտենտ է, հա, իմպոտենտ, որովհետև նախագահական ընտրություններից հետո ունենալ հինգ հարյուր հազար ձայն ունենալ, բայց կորցնել, դրա համար պետք է լինել քաղաքական իմպոտենտ»: