Ծրագրավորման Hello World Open-2014 աշխարհի առաջին առաջնությունը կանցկացվի Ֆինլանդիայում

Ծրագրավորման Hello World Open-2014 աշխարհի առաջին առաջնությունն այս տարվա ամռանը կանցկացվի Ֆինլանդիայի մայրաքաղաքում: 

Կազմակերպիչների կարծիքով՝ առաջնությունը ծրագրավորման գիտությունը ավելի հասկանալի, հասանելի և գրավիչ կդարձնի մարդկանց շրջանում: «Եկել է ժամանակը գլոբալ մասշտաբով անցկացնել նման մրցում և ամբողջ աշխարհի ցույց տալ, թե որքան կարող է հետաքրքիր լինել ծրագրավորումը»,-նշում են նրանք:

«Մեր գլխավոր նպատակն այդ բնագավառում նոր հանճարներ գտնելն է»,-իր հերթին ընդգծել է առաջնության գլխավոր կազմակերպիչ Վիլլե Վալտոնենը:

Կանոնների համաձայն՝ միջոցառմանը կարող է մասնակցել թիմ, որի ընդհանուր կազմը չի գերազանցում երեք հոգին: Կարևոր պայման է նաև այն, որ նրանք բոլորը պետք է լինեն մեկ պետության քաղաքացիներ: Մինչև ապրիլի 7-ը թիմերին հարկավոր է գրանցվել առաջնության կայքում: Ծրագրավորողների միջև առաջին մրցումները կմեկնարկեն ապրիլի 14-ին և կտևեն մինչև ամսվա վերջը: Դրանից հետո կընտրվեն այն թիմերը, որոնք կմասնակցեն ընտրական փուլերին: Դրանց հաղթողները գլխավոր մրցանակի համար կպայքարեն եզրափակիչում, որը տեղի կունենա հունիսի 5-ին Հելսինկիում:

Ինչպես նշում է ԻՏԱՌ-ՏԱՍՍ-ը, առաջնությունը կկայանա Supercell ֆիննական ընկերության աջակցությամբ, որն աշխարհում շարժական հավելվածների խոշորագույն արտադրողն է: