Ղրիմի ինքնորոշումը ճանաչելու հարցում Հայաստանը պետք է պահպանի ակտիվ չեզոքություն. քաղաքագետ

Ղրիմի Ինքնավար Հանրապետության ինքնորոշումը «դե ֆակտո» իրականություն է, որի հետ վաղ թե ուշ հաշվի են նստելու բոլոր աշխարհաքաղաքական ուժերը: Մարտի 25-ին հրավիրված ասուլիսում նման կարծիք հայտնեց քաղաքագետ Երվանդ Բոզոյանը: Նրա խոսքով` Ուկրաինայում առաջացած ճգնաժամն ընդդիմություն-իշխանություն հակամարտությունից վերափոխվեց Ռուսաստանի և Արևմուտքի միջև աշխարհաքաղաքական պայքարի, ինչի արդյունքն էր նաև Ղրիմի ինքնորոշումը:

«Այն դասը, որը պետք է քաղեն բոլոր պետություններն Ուկրաինայի օրինակից, այն է, որ պետք չէ երկրի ներքին խնդիրները դարձնել ուշադրության առարկա դրսի ուժերի համար»,-նշեց Բոզոյանը:

Նրա խոսքով` Ղրիմի ինքնորոշման նկատմամբ Հայաստանը չեզոք քաղաքականություն պետք է որդեգրի, ինչը և հայաստանյան իշխանությունները պահպանում են' հաշվի առնելով այն հանգամանքը, որ Ռուսաստանի, Ֆրանսիայի և ԱՄՆ-ի ներկայացուցիչները Լեռնային Ղարաբաղի բանակցային գործընթացքում միջնորդներ են:

«Դիվանագիտական առումով շահավետ է ասել, որ Ղրիմի ինքնորոշումը նախադեպ չի կարող դառնալ Ղարաբաղի համար, սակայն իրականում Ղրիմը, Կոսովոն, Աբխազիան նման են իրար: Հաշվի առնելով այն հանգամանքը, որ միջազային հանրությունը տառապում է կատարյալ ցինիզմով` Հայաստանը զգուշավոր քաղաքականություն պետք է վարի' տարանջատելով Լեռնային Ղարաբաղի խնդիրը մյուսներից»,-պարզաբանեց քաղաքագետը:

Նա շեշտեց, որ եթե Հայաստանը ցանկանա նմանեցնել Լեռնային Ղարաբաղի հակամարտությունը Ղրիմին, ապա Ադրբեջանն ամեն կերպ քայլեր կձեռնարկի բանակցային գործընթացը փոխելու համար' պատճառաբանելով, որ Մադրիդյան սկզբունքները հնացած են:

Բանախոսը կարծիք հայտնեց նաև, որ Հայաստանը կարող է հանդես գալ միջնորդական առավելություն կատարողի դերում' բարելավելու համար հարաբերությունները Ռուսաստանի և Ուկրաինայի միջև:

«Մայդանային» հեղաշրջումից հետո Ուկրաինայում իրավիճակը շարունակում է թեժ մնալ: Արդեն մի քանի օր է` անհանգիստ է նաև Ղրիմում: Այդտեղ միաժամանակյա հանրահավաքներ են անցկացրել ռուսական և արևմտյան ինտեգրման կողմնակիցները: ՌԴ Նախագահ Վլադիմիր Պուտինը մարտի 1-ին դիմել է Դաշնային Խորհրդին՝ ԶՈՒ-ն Ուկրաինայի տարածքում օգտագործելու հարցով և ստացել աջակցություն: Պուտինը հետագայում հայտարարել է, որ Ռուսաստանն Ուկրաինա զորք մտցնելու հնարավորություն ունի, բայց առայժմ անհրաժեշտություն չի տեսնում: