Ադրբեջանում ակնհայտ մտավախություն կա. Սարգիս Ասատրյան

Ղրիմի դեպքերի ի հայտ գալուց հետո ադրբեջանական մամուլում մտավախություն կա, որ Ղրիմի անկախացումը կամ միացումը Ռուսաստանին, կարող է նախադեպ հանդիսանալ ազգերի ինքնորոշման իրավունքի գերակա դիրք զբաղեցնելու համար: Այս մասին Լուրեր.com-ի հետ զրույցում ասաց ադրբեջանագետ Սարգիս Ասատրյանը` նկատի ունենալով, որ այնտեղ ապրող ժողովուրդը քվեարկել և որոշել է իր հետագա ճակատագիրը:

«Այս առումով ակնհայտ մտավախություն կա Ադրբեջանում, և նայելով նրանց արձագանքը, կարող ենք գալ այնպիսի եզրակացության, որ Ադրբեջանը, փաստորեն, Ռուսաստանին դիտարկում է` որպես վտանգ իր տարածքային ամբողջականությանը, այն առումով, որ բոլոր միտումները կան, որ Ղարաբաղը նույնպես կարող է դե յուրե ճանաչվել, ինքնորոշվել կամ միանալ Հայաստանին:

Սա Ղարաբաղի ժողովրդի  որոշումն է, բայց կարևորն այս դեպքում այն չէ, թե արդյունքում ինչ կլինի, կարևորը նրանց ուշագրավ արձագանքն է»,- ասաց նա:

Սարգիս Ասատրյանը նշեց նաև, որ շատ կարևոր է, թե Հայաստանն իրեն ինչպես կդրսևորի այս պարագայում, ինչ քաղաքականություն կվարի.

«Պետք է ի վերջո կարողանալ նաև օգտվել նման քաղաքական շանսից, իսկ թե ինչ կլինի, կարծում եմ` ցույց կտա ժամանակը»,- ասաց նա:

Անդրադառնալով Ուկրաինայի ԱԳՆ-ի բողոքի նոտային` ուղղված Հայաստանի ԱԳՆ-ին և Սանկտ-Պետերբուրգում Հայաստանի գլխավոր հյուպատոսի շնորհավորանքներին` ուղղված ռուսներին` Ղրիմի Ռուսաստանի կազմ վերադառնալու կապակցությամբ, Ասատրյանը նշեց, որ Հայաստանն, ըստ էության, արդեն հայտնել է իր պաշտոնական  դիրքորոշումը.

«Հայաստանը փաստացի ճանաչում է ազգերի ինքնորոշման իրավունքը, սա է ամբողջ խնդիրը, այսինքն` Հայաստանը ոչ թե հակաուկրաինական քայլ է կատարում, կամ ինչ-որ վնաս է պատճառում Ուկրաինային, այլ պաշտպանում է ազգերի ինքնորոշման իրավունքը, իսկ Հայաստանի քաղաքականությունը միշտ էլ այդպիսին է եղել` ազգերի ինքնորոշման իրավունքը որոշիչ տեղ է ունեցել»,- ասաց նա: