«Արտավազդն» այս տարի կնվիրվի Հրաչյա Ղափլանյանի հոբելյանին

Հայաստանի թատերական գործիչների միության «Արտավազդ» մրցանակաբաշխությունն այս տարի կնվիրվի հայ ականավոր բեմադրիչ Հրաչյա Ղափլանյանի ծննդյան 90-ամյակին: Թատրոնի միջազգային օրը' մարտի 27-ին, ավանդաբար կազմակերպվող թատերական տոնն այս տարի կունենա իր առանձնահատկությունները:

«Թատրոնի միջազգային օրը նշվում է ամբողջ աշխարհում, և մենք ևս բացառություն չենք. ամփոփվում են վերջին տարվա ընթացքում կատարված աշխատանքները: Այս տարվա մրցանակաբաշխությունը կունենա իր առանձնահատկությունները: Երիտասարդական թևը բավականին ուժեղ էր ներկայացված, հնարավոր է, որ ժյուրին լրացուցիչ որոշումներ կատարի: Արդյունքներն ինձ հայտնի կդառնան վաղը ցերեկը»,- նշեց ՀԹԳՄ նախագահ Հակոբ Ղազանչյանը:

Նա ընդգծեց, որ անհրաժեշտ է երիտասարդներին ոգևորել և ինքնաարտահայտվելու հնարավորություն ընձեռել, որպեսզի նրանք իրենց գնահատված զգան: Երիտասարդությունն այսօր, ըստ Հակոբ Ղազանչյանի, շատ լավն է: «Արժանի ներկայացումները չպետք է դուրս մնան մրցանակաբաշխությունից: Երեկ մենք Գորիսի և Կապանի թատրոններում դիտեցինք վերջին ներկայացումները: Չի եղել մի դեպք, որ ես խոչընդոտեմ, ազդեմ հանձնաժողովի որոշման վրա կամ էլ խնդրեմ որևէ ներկայացմանը կամ անհատին տալ մրցանակ: Ես մտածում եմ բեմի ձևավորման մասին' աշխատավարձի, տրանսպորտի հարցերն եմ լուծում, և ոչ մի այլ բանի մասին»,- հավելեց Հակոբ Ղազանչյանը:

Այս տարվա հաղթողները թանկարժեք նվերներ կստանան' կոնյակի տեսքով: Երեկոն կվարեն են Վիգեն Ստեփանյանը և Լուիզա Ղամբարյանը:

«Արտավազդ» ամենամյա մրցանակները շնորհվում են յուրաքանչյուր տարվա մարտի 27–ին կամ դրա նախօրեին' մրցանակաբաշխության նախորդ տարվա մարտի 1–ից մինչև մրցանակաբաշխության տարվա մարտի 1-ը ընկած ժամանակահատվածում առավել աչքի ընկած թատերական աշխատանքներն ստեղծողներին:

«Արտավազդ» մրցանակ կտրվի հետևյալ անվանակարգերում' «Թատերարվեստին արժանապատիվ ծառայության համար», «Լավագույն երիտասարդ դերասանուհի», «Լավագույն երիտասարդ դերասան», «Լավագույն երիտասարդ բեմադրիչ», «Լավագույն երիտասարդական ներկայացում», «Լավագույն սցենոգրաֆիա», «Լավագույն երաժշտության հեղինակ», «Լավագույն պիես», «Երկրորդ պլանի լավագույն կին դերակատար», «Երկրորդ պլանի լավագույն տղամարդ դերակատար», «Լավագույն կին դերակատար», «Լավագույն տղամարդ դերակատար», «Լավագույն ռեժիսուրա», «Լավագույն ներկայացում»:

Մրցանակաբաշխության համար կազմվել է 7 հոգանոց փորձագետների խումբ, որոնց կազմում են Լևոն Մութաֆյանը, Կարինե Խոդիկյանը, Դավիթ Մուրադյանը, Վիգեն Ստեփանյանը, Մերի Սարգսյանը, Նվարդ Ասատրյանը, Զարուհի Անտոնյանը: Փորձագետը յուրաքանչյուր անվանակարգում նշում է 1 կամ 2 աշխատանք: Եթե նրա կարծիքով անվանակարգում արժանի թեկնածու չկա, ապա ձևաթուղթը թողնվում է դատարկ: Ծրարների բացումն ու ձայների հաշվարկը կատարվում է բացառապես մրցանակաբաշխությունը համակարգողի կողմից, մրցանակաբաշխության օրը: Այն անվանակարգում, որտեղ ներկայացված աշխատանքներից ոչ մեկը չի հավաքի փորձագետների 4 և ավելի ձայներ, այդ անվանակարգում մրցանակը չի շնորհվի: Եթե որևէ անվանակարգում երկու աշխատանքներ հավաքել են 4 և ավելի ձայներ, ապա դրանք բոլորն էլ համարվում են այդ անվանակարգի մրցանակակիր:

«Արտավազդ» թատերական մրցանակաբաշխությունը հիմնադրվել է 1996 թվականին: Սկզբում ունենալով միայն մեկ անվանակարգ' «Թատերարվեստին արժանապատիվ ծառայության համար»: Մրցանակաբաշխությունը 2008-ից անցկացվում է մեծ շուքով: