Կառավարությունը պատրաստ է առանց նախապայմանների հանդիպել «Դ!եմ եմ» շարժման անդամների հետ. Վաչե Գաբրիելյան

Կառավարությունը պատրաստ է հանդիպել «Դեմ եմ» շարժման անդամների հետ և նրանց հետ քննարկել պարտադիր կուտակային կենսաթոշակների մասին օրենքում առկա բացերը: Այս մասին ՀՀ ԱԺ-ում կառավարության հետ հարց ու պատասխանի ժամանակ ասաց ՀՀ կառավարության աշխատակազմի ղեկավար-նախարար Վաչե Գաբրիալյանը՝ պատասխանելով ԲՀԿ խմբակցության պատգամավոր Տիգրան Ուրիխանյանի հարցին: «Մենք պատրաստ ենք նրանց հետ քննարկել օրենքում առկա բացերը և շտկել դրանք, սակայն, կարծում եմ, որ չի կարելի նախապայմաններով խոսել»,- ասաց Գաբրիելյանը՝ պատասխանելով հարցին, թե կհանվի՞ արդյոք պարտադիր բաղադրիչը, քանի որ «Դ!եմ եմ» շարժման անդամները պատրաստ են քննարկում սկսել միայն այն ժամանակ, երբ կհանվի պարտադիր բաղադրիչը:

Գաբրիելյանը կարծիք հայտնեց, որ աշխատանքային հանդիպման ժամանակ, որ կլինի կառավարության և «Դ!եմ եմ» շարժման անդամների միջև, հնարավոր կլինի փոխըմբռնման եզրեր գտնել և հասկանալ, թե ինչ է հարկավոր անել: Նախարարն ընդգծեց, որ այդ ամենը պետք է տեղի ունենա Սահմանադրական դատարանի որոշումից հետո, երբ ամեն ինչ ավելի հստակ կլինի: Նա ևս մեկ անգամ շեշտեց, որ կառավարության համար անընդունելի է, երբ առաջադրում են նախապայմաններ: