«Ֆրանկոֆոնիայի օրեր»-ին Երևանը կհեղեղվի բարոկկո երաժշտության հնչյուններով

Ֆրանկոֆոնիայի զարգացմանն ու տարածմանը միտված «Ֆրանկոֆոնիայի օրեր» մեկամսյակը նոր նախաձեռնություններով կներկայանա հայ հանդիսատեսին: Մարտի 26-ին հրավիրված ասուլիսում Հայաստանում Ֆրանսիայի արտակարգ և լիազոր դեսպան Անրի Ռենոն, ներկայացնելով առաջիկա ծրագրերը, նշեց, որ եվրոպական երաժշտությունը Հայաստանում շատ սիրված է:

«Սակայն դասականի հիմք հանդիսացող բարոկկո երաժշտությունը գրեթե ծանոթ չէ հայաստանցիներին»,- նկատեց Ռենոն:

Նա նշեց, որ երաժշտության այդ տեսակը Հայաստանում ավելի հանրայնացնելու նպատակով հայ և ֆրանսիացի մասնագետները, դեսպանատան աջակցությամբ, անակնկալներ են պատրաստել հանդիսատեսի համար:

Ֆրանսիացի պարուսույց Կլոտիլդ Տիրադրիտին, ով Երևանի Թատրոնի և կինոյի պետական ինստիտուտում դասընթացներ է վարում կոմպոզիտոր Պատրիկ Մատոյանի հետ, նշեց, որ ինքը երկրորդ անգամ է Հայաստանում:

«Մեր նպատակն է Թատրոնի և կինոյի պետական ինստիտուտի հետ հետագա համագործակցություն ծավալելը: Այս տարի որոշեցինք առանձնահատուկ մոտեցում դրսևորել հայ ուսանողների նկատմամբ»,- պատմեց Տիրադրիտին' ավելացնելով, որ բարոկկո երաժշտությունը լավագույնս համարդրելի է պարային ժամանակակից շարժումների հետ:

Նա նշեց, որ «Հելիոտրոպիոն» ընկերությունը, որն ինքը ներկայացնում է, գտնվում է Փարիզից ոչ շատ հեռու, այն ստեղծվել է որպես տարբեր երկրներից հավաքված արտիստների հանդիպման և փորձի փոխանակման վայր:

2013 թվականի հոկտեմբերին իրենց աշխատանքի արդյունքում Թատրոնի և կինոյի ինստիտուտի ուսանողնրը «Քաղաքային խորեգրաֆիկայի էտյուդ» 20 րոպե տևողությամբ պարային ներկայացումով մասնակցել են «Հայ ֆեստ» փառատոնին: Տիրադրիտին տեղեկացրեց, որ ներկայումս իրենք, գործընկերների հետ, նախապատրաստում են ավելի երկարաժամկետ համագոծակցության նախագծեր:

Երևանի կինոյի և թատրոնի ազգային ինստիտուտի երաժշտական կոմեդիայի բաժնի ղեկավար Արմեն Մելիքսեթյանը նշեց, որ այս համագործակցությունն իսկապես մեծ օգուտ է տվել ուսանողներին:

«Հույս ունեմ, որ համագործակցությունը կշարունակվի, որովհետև ուսանողները մեծ հաճույքով են գալիս վարպետության այս դասերին»,- փաստեց Մելիքսեթյանը' հույս ունենալով, որ իրենց կհաջողվի ավարտին հասցնել ֆրանսիացի կոմպոզիտոր Ռամոյի երաժշտության հիման վրա արված նոր բեմադրությունը:

«Օշական» համույթի ղեկավար կոմպոզիտոր Գրիգոր Առաքելյանը տարիներ շարունակ տարածում է հայ միջնադարյան երաժշտությունը Ֆրանսիայի և Կանադայի ճանաչված բեմերից:

Հայաստանում նա ներկայացնում է բարոկկո երաժշտությունը, որը հաճախ չի հնչում:

Օպերայի և բալետի ազգային ակադեմիական թատրոնի նվագախմբի երաժիշտների մասնակցությամբ նա կազմել է համույթ, որը հայ ունկնդրին ներկյացնում է եվրոպական բարոկկո երաժշտությունը և բարոկկո կատարողական ոճը:

Հայաստանում «Ֆրանկոֆոնիայի օրեր»-ի շրջանակում Առաքելյանն իր համույթի հետ պատրաստել է բարոկկոյի ծրագիր, որը կներկայացվի հանդիսատեսի դատին ապրիլի 8-ին Օպերայի և բալետի ազգային ակադեմիական թատրոնում «Համերգներ ճեմասրահում» նախագծի շրջանակում:

«Համերգի ընթացքում կհնչեն ֆրանսիացի բարոկկո կոմպոզիտորների ստեղծագործությունները, որոնք Հայաստանում երբևիցե չեն հնչել: Դրանք թվում են Մարեի, Լյուլիի, Կուպերենի և Ռամոյի ստեղծագործությունները»,- նշեց Առաքելյանը' հավելելով, որ այնպես է սացվել, որ, լինելով Հայաստանի քաղաքացի և ապրելով այստեղ, ինքն ավեի շատ համերգներ է ունենում Ֆրանսիայում:

«Արտերկրում մենք հնչեցնում ենք Նարեկացի, Մաշտոց, Կոմիտաս, մեր միջնադարյան երաժշտական մշակութային հզոր շերտը»,- ասաց Առաքելյանը:

Նրա կարծիքով, բարոկկո երաժշտությունը դասական երաժշտության հիմքն է, որի կատարողական ոճի տարածումը, կարծես, բաց է մնացել մեր երկրում:

Ներկայացնելով բարոկկո երաժշտության առանձնահատկությունը' մասնագետը հորդորեց «բարոկկո» ասելով չհասկանալ միայն այդ ժամանակաշրջանին բնորոշ երաժշտությունը, այլ երաժշտություն, որը նաև ժամանակակից է:

Անրի Ռենոն էլ հավելեց, որ համերգը խորհրդանշական է, քանի որ Ֆրանսիայում հայտարարված է կոմպոզիտոր Ռամոյի տարին:

«Ֆրանկոֆոնիայի օրեր» մեկամսյակը մարտի 14-ին մեկնարկել է Երեւանի պետական լեզվաբանական համալսարանում: Մեկամսյակի ընթացքում տեղի կունենան մի շարք միջոցառումներ, այդ թվում' թատերական ներկայացումներ, ակադեմիական նվաճումների կենտրոնի բացման հանդիսավոր արարողություն, «Լավագույն էսսե» միջհամալսարանակաան մրցույթ, ինչպես նաեւ «Աշխարհի լեզվական պատկերը» խորագրով 5-րդ միջազգային գիտաժողովը: