Սրտանոթային բուժկենտրոնի ղեկավարի կարծիքով` Հայաստանում սրտանոթային հիվանդությունները չեն երիտասարդացել

Հայաստանում սրտաբանական կլինիկաները վերջին տարիներին շատացել են: Այս մասին լրագրողների հետ հանդիպմանն ասաց «Քանկոր» սրտանոթային բուժկենտրոնի ղեկավար Շահեն Խաչատրյանը: Նրա խոսքով, նման կլինիկաների ավելացումն ունի ե’ւ դրական, ե’ւ բացասական միտում: «Դրական միտումը պայմանավորված է նրանով, որ մենք այսօր բավական որակյալ մասնագետներ ունենք: Բացասական միտումն էլ բացատրվում է նրանով, որ կլինիկաների շատացման հետ մեկտեղ, հիվանդները քչանում են, իսկ թերծառնաբեռնված կլինիկաներում տուժում են բժիշկները, ովքեր պետք է անընդհատ աշխատեն' իրենց մասնագիտական որակ ավորումը բարձր պահելու համար»,- ասաց նա:

Խաչատրյանի խոսքով, սրտաբանական ծառայություններից շատ քիչ մարդիկ են օգտվում' սոցիալական խնդիրների պատճառով: «Վերջին տարիներին, սակայն, կառավարությունը մեծացրել է պետպատվերի շրջանակը, որը դարձյալ չի հերիքում սրտի բարդ վիրահատություններ կատարելու համար»,-ասաց նա:

Բուժկենտրոնի ղեկավարը թյուր համարեց այն կարծիքը, թե Հայաստանում սրտանոթային հիվանդությունները երիտասարդացել են' նշելով, որ ոչ թե հիվանդություններն են երիտասարդացել, այլ բժշկությունն է զարգացել, ինչպես նաեւ զարգացել է բժշկին ժամանակին դիմելու ավանդույթը: «Եթե 90-ականների վերջերին Հայաստանում մարդու միջին տարիքը տատանվում էր 64-65-ի սահմաններում, այսօր մարդն ապրում է 70 տարուց ավելի, եւ դա ոչ միայն լավ ապրուստի, այլեւ բժշկության շնորհն է: 90-ականներից մինչ հիմա մոտ 30 հազար մարդ է վիրահատվել, մարդիկ, որոնք եթե չվիրահատվեին' կմահանային, քանի որ սրտի հիվանդությունները մահացու հիվանդություններ են»,-ասաց նա:

Խաչատրյանը նշեց նաեւ, որ Հայաստանում սրտանոթային հիվանդությունների բու-ումն իրականացվում է արտասահմանում ձեռք բերված բավական լավ տեխնիկայով: «Եթե նույն տեխնիկայով վիրահատության գինը, օրինակ, ԱՄՆ-ում տատանվում է 50-60 հազար դոլարի սահմաններում է, ապա Հայաստանում նույն վիրահատությունն արժե 5000 դոլար: Մեզ մոտ 95 տոկոսը վիրահատության ինքնարժեքն է: 5 տոկոսն ենք մենք միայն որպես աշխատավարձ հատկացնում բժշկին»,-ասաց կլինիկայի ղեկավարը' հավելելով, որ ցածր աշխատավարձն էլ հիմնականում ստիպում է լավ մասնագետներին արտագաղթել երկրից: