Արտաշատում էր ՌԴ արտակարգ և լիազոր դեսպանը

Ճանաչողական այցով մարտի 27-ին Արարատի մարզում էր ՀՀ-ում ՌԴ արտակարգ և լիազոր դեսպան Իվան Վոլինսկին: Արարատի մազպետ Արամայիս Գրիգորյանի աշխատասենյակում ընդունելությանը ներկա էին նաև մարզպետի տեղակալ Աշոտ Մուրադյանը և մարզպետի խորհրդական Ալբերտ Յակուբովը: Հանդիպման սկզբում մարզպետը նախ շնորհավորեց դեսպանին Ղրիմը ՌԴ-ին միացնելու կապակցությամբ, այնուհետև ներկայացրեց մարզի բնակչությունը, քաղաքները, գյուղատնտեսական և արդյունաբերական առաջավոր ճյուղերը, տեսարժան վայրերն ու մարզը` որպես գինու, կոնյակի արտադրության առաջատար ՀՀ-ում, նաև այն հանգամանքը, որ մարզը համագործակցում է ՌԴ Ռոստովի մարզի հետ: Նա նշեց, որ կարիք ունեն գործընկերների, որոնց միջոցով հնարավոր լինի մարզի արտադրանքն արտահանել ՌԴ' վաճառքի նպատակով:

Վոլինսկին իր խոսքում շնորհակալություն հայտնեց հրավերի համար' նշելով, որ հետաքրքիր է ծանոթանալ Արարատի մարզին: Նպատակ ունի այցելել ՀՀ բոլոր մարզերը, տեղում ծանոթանալ յուրաքանչյուրի հնարավորություններին, գտնել համագործակության եզրեր: Նա նշեց, որ ոչ պաշտոնական այցով եղել է Խոր Վիրապում, հաճույքով է իր հյուրերին այնտեղ ուղեկցում: Այնուհետև գյուղնախարարի հետ եղել է ձկնաբուծական տնտեսություններում: Հիացած և զարմացած է ձկների պաշարով և զանազանությամբ, գիտի, որ Հայաստանի ձուկն արտահանվում է ՌԴ: Նա հե տաքրքրվեց նաև Արտաշատի պահածոների գործարանի արտադրանքով, նշեց, որ ՌԴ-ի խանութներում տեսել է հայկական արտադրանքը: Հիացած է նաև հայկական հյութերի արտադրությամբ և տեսականիով: Կցանկանար հետագայում արտահանվեր այդ արտադրանքը: Խոսելով խմիչքների արտադրությունից' Վոլինսկին ասաց, որ նախկինում Հայաստանին ծանոթ էր միայն որպես կոնյակ արտադրող երկրի, իսկ այսօր արդեն գիտի, որ Հայաստանում այնպիսի գինիների տեսակներ կան, որ աշխարհում ոչ մի տեղ չի տեսել: Դեսպանը բարձր կարծիք հայտնեց նաև արցախյան գինիների որակի վերաբերյալ:

«Ուզում եմ, որ Հայաստանը հզոր հանրապետություն լինի: Մարդիկ իմաստուն են, ուժեղ և շատ հյուրասեր: Նրանք արժանի են, որ լավ կյանքի և ճակատագրի արժանանան, իսկ դրանց հասնելու համար անհրաժեշտ է ճանապարհներ գտնել: Իսկ դա մեր հետաքրքրությունների շրջանակներում է»,-ընդգծեց նա:

Վոլինսկին շեշտեց նաև, որ Հայաստանը Ռուսաստանի Դաշնության ամենահուսալի գործընկերն է: «Մենք շատ ենք գնահատում, որ Հայաստանը նման քաղաքականություն է վարում»,-հավելեց նա:

Դեսպանը նաև ներկայացրեց իր գործունեությունն այն երկրներում, որտեղ վարել է արտակարգ և լիազոր դեսպանի պաշտոններ, Հարավսլավիայում, ԱՄՆ-ում, Վրաստանում, Մակեդոնիայում:

Մարզպետը բարձր գնահատեց նաև սահմանապահ զորքերի գործունեությունը Հայաստանում, մասնավորապես Արտաշատում, որտեղ տեղակայված է Արտաշատի սահմանապահ զորամասը: Նա նշեց, որ հաճախ են իրենց մոտ հյուրընկալվում զորքերի ղեկավարները, ծառայողներն ու սահմանապահները: Նրանք իրենց աշխատանքը պատշաճ մակարդակով են կատարում:

Հանդիպման ավարտին մարզպետը դեսպանին հրավիրեց առաջիկայում կրկին այցելել մարզ, լինել գործարաններում, տեղում ծանոթանալ համագործակցության հետագա հնարավորություններին: