Աֆղան ցուցարարները պաշարել են ՄԱԿ–ի շինությունները

Հազարավոր ցուցարարներ պաշարել են Աֆղանստանի հյուսիսում գտնվող ՄԱԿ–ի շինությունների համալիրը։ Անվտանգության ուժերի հետ ընդհարման արդյունքում զոհվել է 3 մարդ, տասնյակ մարդիկ վիրավորվել են։ ՄԱԿ ներկայացուցիչները հաղորդում են, որ ողջ քաղաքով մեկ անկարգություններ են տեղի ունենում՝ այրում են խանութները, հասարակական հաստատությունները, ավտոմեքենաները։ Այս մասին է հայտնում «Ֆրանս պրես» լրատվական գործակալությունը։

«Ընդհարումներ են տեղի ունեցել ոստիկանության և ցուցարարների միջև։ Բողոքի ակցիայի մասնակիցները փորձում են ներխուժել ՄԱԿ համալիրի տարածք, սակայն ոստիկանությունը թույլ չի տալիս նրանց իրականացնել դա»,– հայտարարել է ոստիկանության ներկայացուցիչ Կունդուզ Սարվարա Հուսայինին, հաղորդում է «Ռիա նովոստի»–ն։

Նշենք, որ հակաարևմտյան ցույցերն Աֆղանստանում շարունակվում են արդեն 5 օր շարունակ։

Հիշեցնենք, որ մի քանի օր առաջ Բաղրամի օդանավակայանում ամերիկացի զինվորականներն այրել են մի քանի կրոնական բնույթի գրքեր, այդ թվում նաև Ղուրանի մի քանի օրինակ, ինչն էլ համընդհանուր զայրույթի ալիք է բարձրացրել Աֆղանստանում։