«Հրապարակ». Լուռ ակցիա ՍԴ-ի դիմաց

«Դեմ եմ» նախաձեռնության անդամները երեկ հայտարարեցին, որ այսօր իրենք Սահմանադրական դատարանի դիմաց լուռ ակցիա են անելու, որը երկու ուղերձ ունի. առաջինը վերաբերում է նրան, որ ակնկալում են Սահմանադրական դատարանից արդար որոշում, երկրորդ ուղերձով երիտասարդները փորձում են չխոչընդոտել Սահմանադրական դատարանի աշխատանքը: Նախաձեռնության անդամները նշում են, որ եթե Սահմանադրական դատարանն օրենքից «պարտադիր» բաղադրիչը չհանի, իրենք ընդվզման ակցիաներով են հանդես գալու, որոնք կտարբերվեն մինչ այս եղածներից։ Նաեւ նշում են, որ ի սկզբանե իրենց պայքարը «պարտադիրի» դեմ է եղել, եւ հանրության 80 տոկոսը համամիտ է դրան: Ընդգծեցին, որ սա հանրային խումբ է, հանրային պահանջ, իսկ հանրային պահանջը համարել նախապայման, վիրավորական է եւ ոչ կոռեկտ: Գրում է «Հրապարակ»-ը:

Փորձեցինք պարզաբանումներ ստանալ «Դեմ եմ» նախաձեռնության անդամ Արտաշես Արաբաջյանից, թե ինչ մարտավարություն են մշակել, ինչ հետագա քայլեր են անելու, հատկապես ինչպիսի ընդվզման ակցիաներ են նախատեսում, որոնք տարբերվելու են մինչ օրս արածներից: «Հետագա քայլերը կախված կլինեն, թե այսօր ինչպես է քննարկումն սկսելու Սահմանադրական դատարանը, նաեւ պիտի հաշվի առնենք, որ մինչեւ 3 ամիս կարող է ընթանալ այս պրոցեսը։ Բայց շատ կարեւոր է, թե վաղն ինչպես կսկսվի դատավարությունը, հենց դրանով էլ պայմանավորված կլինեն մեր հետագա անելիքները»։ Անկախ ամեն ինչից, փորձելու են պայքարել, որ «պարտադիրը» հեռացվի։ Այս պահին փորձում են զերծ մնալ գնահատականներից՝ արդյո՞ք կվերացվի պարտադիրը։ «Փորձում ենք այդ ուղղությունով տանել, իսկ ապագայում կտեսնենք, թե ինչ քայլեր կձեռնարկվեն իշխանության կողմից, ու ըստ այդմ էլ կորոշենք մեր անելիքը։ Բայց մինչեւ իշխանությունը, չմոռանանք, որ գործը Սահմանադրական դատարանում է, տեսնենք, թե ինչ է կատարվում, որ ավելի ռեալ ու կոնկրետ պատասխան տանք հարցերին»,- շարունակում է Արաբաջյանը։ Իսկ վարչապետի հետ նախատեսվող հանդիպման մասին ասաց. «Մենք առաջարկել ենք, եթե կա պատրաստակամություն «պարտադիր» բաղադրիչից հրաժարվել, պատրաստ ենք հանդիպել։ Բայց մենք մինչ օրս նման պատրաստակամության մասին չենք լսել, իսկ դա նշանակում է, որ այս պահին հանդիպում չի կարող տեղի ունենալ։ Մեր պայքարի հիմնական եւ միակ մեխն այդ «պարտադիրն» է, եթե դրա հանելու հետ կապված քննարկում չի ծավալվելու, ես իմաստ չեմ տեսնում հանդիպման»։

Լուրեր կան, թե «Դեմ եմ»-ը զբաղված է կենսաթոշակային ֆոնդերի հետ կապված հետաքննությամբ, մասնավորապես՝ փորձում են պարզել, թե վարչապետն ու իր թիմն ինչ թելերով են կապված այդ ֆոնդերի ղեկավարների հետ, Արտաշեսը պատասխանեց. «Ճիշտն ասած՝ մենք ինքներս էլ չենք հետաքրքրվում, թե ով ինչ կապ ունի, քանի որ մեզ համար կապ չունի, թե այդ գումարներն ի վերջո ուր են գնալու, մեզ համար խնդիրն այդ պարտադիր պահումներն են»։ Իսկ հնարավո՞ր է քաղաքական պահանջներ առաջ քաշեն, քանի որ հասարակությունն ավելի շատ դրան է հակված, այդ դեպքում ավելի շատ մարդիկ կներգրավվեն պայքարում։ «Մեր օրակարգում այս պահին միայն «պարտադիր» բաղադրիչն է, ու մենք պայքարում ենք դրա դեմ եւ ոչ մի ցանկություն չունենք գալ իշխանության, կարծում եմ՝ հենց դա նկատի ունեն մարդիկ, որ ասում են։ Սա, իհարկե, քաղաքացիական նախաձեռնություն է, բայց հարցը քաղաքական է եւ նշանակում է, որ քաղաքական հարցի շուրջ ենք պայքարում, բայց քաղաքական միտումներ, ցանկություններ՝ գալ իշխանության, այս պահին մեր օրակարգում չկան»,- հավաստիացրեց Արտաշես Արաբաջյանը։

Շարունակությունը` «Հրապարակ» օրաթերթի այսօրվա համարում: