«Հրապարակ». Բարդ օրեր է ապրում ՀՀ իշխանությունը. հսկողություն է սահմանվել ասուլիսների նկատմամբ

Բարդ օրեր է ապրում ՀՀ իշխանությունը: Չկա օր, որ ինչ-որ անախորժ պատմություն, բարդ ու խճճված խնդիրների լուծման անհրաժեշտություն չծագի: Հազիվ էին աչք բացել Մաքսային-Եվրամիություն գործընթացից, դեռ գլուխ չէին հանել կուտակայինի հետ կապված դժգոհություններից, հիմա էլ Քեսաբում ծավալված դեպքերը բարդացրին իրավիճակը: Իբր ներսում շատ էին կարողանում հարցերը լուծել ու ջրի երեսին մնալ, այժմ էլ ստիպված են գոնե ձեւականորեն հոգ տանել մեր սիրիահայ հայրենակիցների համար, դիվանագիտական ինչ-ինչ քայլեր ձեռնարկել: Այս լարված պահին շատ «անժամանակ» էր սահմանադրական դատավարությունը, որն այսօր է մեկնարկում: Որքան էլ երիտասարդները հայտարարեն, թե ՍԴ-ի մոտ բողոքի «լուռ» ակցիա են անելու, ոչ մի երաշխիք չկա, որ իրավիճակը չի շիկանա, եւ երեկոյան Րաֆֆի Հովհաննիսյանի հայտարարած «նախահավաքն» այն դետոնատորը չի դառնա, որից պայքարի նոր ալիք կբռնկվի:

Որքան էլ իշխանությունը հայտարարի, որ իրավիճակը կառավարելի է: Որքան էլ վստահ լինենք, որ զենքն ու զորքը հարկավոր պահի կկիրառվեն, համոզված եղեք, որ իշխանության ներսում տագնապ կա, եւ դա տարբեր դրսեւորումներ է ունենում: Երեկ, օրինակ, տեղեկություն ստացանք, որ իշխանությունը հսկողություն է սահմանել տարբեր ակումբներում հրավիրվող ասուլիսների նկատմամբ: Եվ ամեն ինչ անում է, որ այս շրջանում, երբ կուտակայինի, կառավարության անվստահության թեման թեժ է, ասուլիս տվողներն ավելորդ չշիկացնեն մթնոլորտը:

Թերթի տեղեկություններով, ակումբներից մեկի գործունեությունն անգամ կասեցրել են, քանի որ վերջին ասուլիսին մասնակցողներից մեկը շատ խիստ գնահատականներ է հնչեցրել իշխանությունների հասցեին: Թեեւ խոստացել են, որ կասեցումը ժամանակավոր է, սակայն դա կախված կլինի դեպքերի հետագա ընթացքից:

Շարունակությունը` «Հրապարակ» օրաթերթի այսօրվա համարում: