Աճեմյանցիներն «Արտավազդ»-ից վերադարձել են երկու մրցանակով

Գյումրու Վ. Աճեմյանի անվան պետական դրամատիկական թատրոնը «Արտավազդ»-ից վերադարձել է երկու մրցանակով: Նշենք, որ այս տարի ամենամյա մրցանակաբաշխությանը թատրոնը մասնակցեց Լևոն Մութաֆյանի «Առնետները» պիեսով: «Լավագույն ռեժիսոր» անվանակարգում հաղթող է ճանաչվել թատրոնի գլխավոր ռեժիսոր Լյուդվիգ Հարությունյանը, իսկ «Լավագույն սցենոգրաֆիա» անվանակարգում` «Առնետները» ներկայացման նկարչական ձևավորող Սեդրակ Վելիկոդնին:

Թատրոնն այս անգամ մրցանակաշխությանը մասնակցեց 5 անվանակարգերում՝ «Լավագույն սցենոգրաֆիա», «Լավագույն երիտասարդ ռեժիսոր», «Լավագույն երիտասարդական ներկայացում», «Լավագույն երկրորդ պլանի տղամարդ դերասան» և «Լավագույն երկրորդ պլանի դերասանուհի»:

«Աճեմյանցիները գյումրեցիներին խոստանում են առաջիկայում ևս զարմացնել ու ուրախացնել: Կլինեն նոր ներկայացումներ՝ հաշվի առնելով թատերասերի ճաշակը: Թատերասերը մնացել է նույնը, պարզապես փոխվել են հանդիսատեսի ընկալումները»,-ասել է ՀՀ վաստակավոր արտիստ, Գյումրու Վ. Աճեմյանի անվան թատրոնի դերասան և ռեժիսոր Հովհաննես Հովհաննիսյանը: «Գեղագիտական ընկալումն ու ճաշակը փոխվել է՝ դարձել ավելի խայտաբղետ, այդ պատճառով պետք է բազմազան ու ախորժալի բան մատուցես: Միայն այդ դեպքում խստապահանջ թատերասերը կընդունի ու կսիրի, բայց որ սիրեց՝ կսիրի երկար: Խոսքն ինչպես ժամանակակից, այնպես էլ դասական գործերին է վերաբերում: «Չար ոգին», օրինակ, 8 տարի շարունակ թատրոնի խաղացանկում է, և հանդիսատեսը մեծ հաճույքով է նայում այն: Գյումրու Վ. Աճեմյանի անվան թատրոնը դեռ ասելիք ունի, շարունակում է մեր կյանքի բաղկացուցիչ մասը լինել, այն մեզ հետ համաքայլ է ընթանում»,-նշեց Հովհաննես Հովհաննիսյանը: