Հայաստանը ՄԱԿ-ում պաշտպանել է ազգերի ինքնորոշման իրավունքը. Գալուստ Սահակյան

ՄԱԿ-ում Ուկրաինայի տարածքային ամբղջականության վերաբերյալ բանաձևին դեմ քվեարկելով՝ Հայաստանը պաշտպանել է ազգերի ինքնորոշման իրավունքը: Այս մասին Ազգային ժողովում ճեպազրույցների ժամանակ ասաց ԱԺ ՀՀԿ խմբակցության ղեկավար Գալուստ Սահակյանը: «20 տարիներ ի վեր, նաև Խորհրդային Միության տարիներին, այդ խնդիրը մեզ համար կարծես որոշակի արժեքային համակարգ է, և մենք պայքարում ենք հենց դրա համար»,-ասաց Սահակյանը:

Նա բնական է համարում, որ Հայաստանը դեմ է քվեարկել բանաձևին: Սահակյանի խոսքով` ազգերի ինքնորոշման իրավունքը մեր պետության ամրապնդման և ազգի ապագայի համար ամենակարևոր արժեքներից մեկն է:

Նա չհամաձայնեց դիտարկման հետ, թե Հայաստանը բանաձևին դեմ է քվեարկել Ռուսաստանի ճնշումների ներքո: «Այսինքն, եթե Ռուսաստանը չճնշեր, մենք պետք է ե՞տ կանգնեինք ազգերի ինքնորոշումը գերակայություն համարող մեր տեսակետից»,- ասաց նա:

Դիտարկմանը, թե Հայաստանը կարող էր ձեռնպահ քվեարկել, Սահակյանը նշեց, որ ձեռնպահ քվեարկել կնշանակեր, որ մեզ համար քննարկելի խնդիր է մնում: «Ազգերի ինքնորոշման իրավունքն ամենակարևոր իրավունքն է և մեզ համար բարձրագույն արժեք է համարվում»,- ասաց Սահակյանը՝ ընդգծելով, որ բանաձևին դեմ քվեարկելը բխում է Հայաստանի շահերից: Նա կարծիք հայտնեց, որ գերտերություններն էլ շատ լավ հասկանում են, որ Հայաստանն իր շահերից ելնելով է այդպես քվեարկել:

ՄԱԿ-ի Գլխավոր ասամբլեան հավանություն է տվել Ուկրաինայի հարցով բանաձևին, որը ճանաչում է այդ երկրի տարածքային ամբողջականությունն ու անօրինական համարում Ղրիմում մարտի 16-ին անցկացված հանրաքվեն։ Հայաստանը դեմ է քվեարկել նախագծին: