«Մազերիս նայեք. այսպիսի պատգամավոր ուզո՞ւմ եք». Հովհաննես Ազոյանը` իր պատգամավոր լինելու, նոր իդեաներ չունենալու և այլնի մասին (տեսանյութ)

Դերասան, շոումեն Հովհաննես Ազոյանը մասնակցել է «Ազատություն TV»-ի «ֆեյսբուքյան» ասուլիսին, որի ժամանակ դերասանն անդրադարձել է կուտակային կենսաթոշակային պարտադիր համակարգին.

«Պետք է ինձանից էլ պահումներ արվեն: Պարզապես հունվար-փետրվար ամիսներին չեմ աշխատել, և աշխատավարձ չի փոխանցվել, բայց պահելու են: Ես շատ լավատեսորեն եմ տրամադրված իմ ծերությանը: Կարծում եմ` պարտադիր կուտակային կենսաթոշակային պրոյեկտը շատ դրական կարող է լինել մեր երկրի համար, քանի որ այդ կերպ ստեղծվում է երկար փող, որը կարելի է օգտագործել` զարգացնելով տնտեսությունը, բանկերում տոկոսադրույքները իջեցնել և այլն: Մի խոսքով` օգտակար բան է: Բայց քանի որ չկա իշխանությունների նկատմամբ վստահություն, մարդիկ դեմ են, այդ թվում նաև ես: Վստահ չեմ, որ ինչ-որ մեկը ճանապարհին չի գողանալու այդ փողը: Իմ անվստահությունը գալիս է ընտրություններից, սաքուլիկներից, իշխանության ներկայացուցիչների անպատասխանատու վերաբերմունքից աշխատանքի, հասարակության նկատմամբ»,- ասաց Հովհաննես Ազոյանը:

Դերասանը նաև իր խոսքում նշեց, որ ինքն արդեն հոգնել է պարզապես խոսելուց: Ստացվում է` ընդդիմադիր կեցվածք ընդունել և խոսելը մոդայիկ բան է դարձել: Մոդայիկ ընդիմադիր լինել չի սիրում: Ըստ նրա` հասարակության լայն շերտերը զբաղված են մոդայիկ քննադատություններով և աշխատանք չեն անում.

«Գիտեք` խոսելուց հոգնել եմ: Ուզում եմ գործել, իսկ գործելու դաշտ չեմ տեսնում: Մասնագիտական գործունեությունս երկրորդական բան է, առաջնայինը հասարակականն է, բայց ես հանդիպել եմ պատի. իդեա չունեմ, vision չունեմ, տեսլական չունեմ... ի՞նչ քայլերի հերթականությամբ պետք է շարժվեմ Հայաստանը փոխելու համար: Եթե չունեմ, լռում եմ»:

Հարց է հնչել նաև` արդյո՞ք Հովհաննես Ազոյանը կցանկանա առաջադրվել որպես պատգամավորի թեկնածու, որին նա պատասխանել է. «Մազերիս նայեք. սենց պատգամավոր ուզո՞ւմ եք: Լավ կլինի, որ սենց մազերով պատգամավոր ունենաք, շատ լավ կլինի (ծիծաղում է): Ես պատրաստ չեմ: Պետք է իսկապես պատրաստ լինեմ: Դո մոդայի համար չէ, իմիջի համար չէ: Ինձ պետք չէ կոստյումով մտնել ԱԺ: Եթե գործ ունենամ անելու` հա, բայց այդ իդեան չունեմ»:

Մանրամասն` տեսանյութում: