«Հրապարակ». ՍԴ նիստի ընթացքը խոստումնալից էր ու հասարակության սրտով

Սահմանադրական դատարանի նիստը, որին այնքան երկար սպասում էր մեր հասարակությունը, մեկնարկեց: Դժվար է ասել, թե ինչքան մարդ էր համացանցում օնլայն հետեւում այդ նիստին: Ի դեպ, վերջին տարիներին նոր մշակույթ է ձեւավորվել. ամենաուշագրավ շոուներից ավելի մեծ լսարան են հավաքում Ազգային ժողովի նիստերն ու համացանցի շնորհիվ ուղիղ հեռարձակվող տարբեր հանրային միջոցառումներ: Երեկ եւս, վստահ եմ, հասարակության ակտիվ հատվածը հետեւում էր ՍԴ նիստին՝ ուրախանում հայցվորների դիպուկ ելույթներով, ոգեւորվում պատասխանողների շփոթությունից, հուսավառվում ՍԴ անդամների «ընդդիմադիր» հարցերից: Կային, անշուշտ, նաեւ հոռետեսներ (գուցե՝ իրատեսներ), որոնք զգուշացնում էին՝ լավ հարցերը վատ վճիռ են նշանակում, բայց նիստի ընթացքը խոստումնալից էր ու հասարակության սրտով:

Հայցվորների փոքրիկ խումբը՝ իր թիկունքին հանրության աջակցությունն ունենալով, նաեւ լավ էր պատրաստվել այս պայքարին: Բացի այն, որ ճիշտ թիմ էր ընտրված՝ Արծվիկ Մինասյան, Արտակ Զեյնալյան, փաստաբան Մերի Խաչատրյան, այլեւ զգալի էր, որ մարդիկ հարգանքով ու լուրջ են վերաբերվել իրենց վրա դրված պատասխանատվությանը, ինչը հնարավոր չէր ասել պատասխանող կողմի մասին: Թեեւ մեղադրելի չէ. խոցելի օրենքն ու հասարակության կողմից մերժված գործընթացը պաշտպանելը հեշտ բան չէ: Ինչքան հավատ ու համոզմունք պետք է ունենաս, որ կարողանաս հաղթահարել հասարակության բացասական վերաբերմունքն ու շրջապատի ընդվզումը:

Բայց առավել կարեւոր է, թե ինչ որոշում է կայացնելու Բարձր դատարանը, որի հարցադրումներից ու հայացքներից ակնհայտ էր հայցի ճշմարտացիության գիտակցումը: Միայն կարեկցանքի են արժանի այդ մարդիկ, եթե ստիպված են մի բան մտածել ու ասել, իսկ վերջում դրան բոլորովին հակառակ վճիռ կայացնել:

Շարունակությունը` «Հրապարակ» օրաթերթի այսօրվա համարում: