«Հրապարակ». Նալբանդյանի կողմից «Ճ» կլասի ինչ-որ ներկայացուցչի ընդունելը Ուկրաինայի հարցում ՀՀ դիրքորոշումից ավելի կարեւոր է

ՀՀ արտգործնախարար Էդվարդ Նալբանդյանի խոսնակ Տիգրան Բալայանը հերքում է լայնորեն տարածված տեղեկությունն այն մասին, թե ՀՀ արտգործնախարարությունը նախապես հայտարարել էր, որ ՄԱԿ-ի գագաթնաժողովում Հայաստանը ձեռնպահ է քվեարկելու Ուկրաինայի տարածքային ամբողջականության հարցով: «Ես նույն օրը պաշտոնապես հայտնել եմ մի քանի ԶԼՄ-ների, որ մենք մեր դիրքորոշումը քվեարկությունից առաջ չենք հրապարակում»,- ասաց Տիգրան Բալայանը: Հիշեցնենք, որ տեղեկության սկզբնաղբյուրն «Ազատություն» ռադիոկայանն էր, որը հղում էր կատարել արտաքին գործերի նախարարությանը:

Թերթի հարցին, թե ինչու ԱԳ նախարարության կայքում չկա պաշտոնական տեղեկատվություն ՄԱԿ-ի հիշյալ բանաձեւի շուրջ մարտի 27-ին տեղի ունեցած քվեարկության վերաբերյալ, խոսնակը պատասխանեց. «Դա գլխավոր ասամբլեայի նիստն է, որը տեւում է մեկ տարի: Մենք դնում ենք մեր կայքում միայն այն նորությունները, որոնց կարեւորություն ենք տալիս»: «Այսինքն, սրան կարեւորություն չե՞ք տվել: Կարեւոր չէ՞ր, թե Հայաստանն ինչ դիրքորոշում է ցուցաբերել Ուկրաինայի հարցով»,- հարցրինք խոսնակին եւ ստացանք պատասխան. «Գիտե՞ք օրական քանի հատ այդպիսի քվեարկություն է տեղի ունենում ՄԱԿ-ի գլխավոր ասամբլեայում»:

Փաստորեն, ԱԳ ոլորտի ամենակարեւոր իրադարձությունների մասին հանրությունն ու ԶԼՄ-ները տեղեկանում են կամ արտասահմանյան մամուլից, կամ միմյանցից, եւ սա այն դեպքում, երբ դրա համար պետությունը ՀՀ արտաքին գործերի նախարարությունում մի ահռելի ապարատ է ֆինանսավորում: Իրազեկման գործը նախարարությունում կատարում են նախարարի մամուլի քարտուղարը, տեղեկատվության եւ հասարակության հետ կապի վարչությունը, որի մեջ երկու բաժիններ են մտնում՝ լրատվամիջոցների հետ կապի բաժին եւ տեղեկատվության եւ հասարակության հետ կապի բաժին՝ ստորաբաժանումներ, որոնք վատ են կատարում իրենց գործը: Վերջին լուրը կայքում նախարարի եւ ՆԱՏՕ-ի խորհրդարանական վեհաժողովի քաղաքական կոմիտեի ներկայացուցչի հանդիպման մասին էր: Փաստորեն, Նալբանդյանի կողմից «Ճ» կլասի ինչ-որ ներկայացուցչի ընդունելը Ուկրաինայի հարցում ՀՀ դիրքորոշումից ավելի կարեւոր է:

Շարունակությունը` «Հրապարակ» օրաթերթի այսօրվա համարում: