Ռուսաստանի ԱԳՆ-ն մեկնաբանել է Սիրիայում տիրող լարված իրավիճակի զարգացումը

Սիրիայում տեղի ունեցող վերջին օրերի իրադարձությունները բնութագրվում են` որպես կտրուկ շրջադարձ, իշխանական և ոչ օրինական զինված ուժերի միջև տեղի ունեցող սուր իրավիճակով: Այդ մասին ասվում է Ռուսաստանի ԱԳՆ մամուլի ծառայության` Սիրիայում տիրող իրավիճակի հետ կապված մեկնաբանության մեջ:

Ինչպես նշում է աղբյուրը, հիմնական բախումները տեղի են ունենում Սիրիայի հյուսիս-արևմտյան տարածքներում: Մարտի 21-ին «Ալ-Քաիդայի» հետ կապված արմատական խմբավորումները հարձակվել են Թուրքիային սահմանամերձ Քեսաբի վրա, որտեղ բնակչության մեծամասնությունը հայեր են: Զգուշանալով ահաբեկիչների բռնություններից՝ Քեսաբի, Սամրայի, Նաբվա Ալ-Մուրի և մոտակա բնակավայերի հայ բնակչությունը Սիրիայի ռազմական ուժերի պաշտպանության ներքո լքել են իրենց տները՝ պատրսպարվելով Լաթաքիայում:

Ինչպես նշվում է մեկնաբանություններում, Քեսաբի գրավումը ծայրահեղականների կողմից խիստ քննադատության է արժանացել ողջ աշխարհի հայության կողմից: Երևանում բողոքի ցույց է կազմակերպվել ՄԱԿ ներկայացուցչության մոտ՝ Սիրիայում ապօրինի զինված խմբերի կողմից էթնիկ կրոնական փոքրամասնությունների նկատմամբ բռնությունները դադարեցնելու պահանջով: Միաժամանակ ՀՀ ղեկավարությունն իր երախտագիտություն է հայտնել սիրիական իշխանություններին` հայ բնակչության պաշտպանության համար: 

«Տպավորություն է ստեղծվում, թե արմատականների գործողությունների նպատակը թույլ չտալն է սիրիացիներին զրկել քաղաքական և դիվանագիտական կարգավորման հնարավորությունից, խափանել քիմիական զենքի չեզոքացումը: Նմանատիպ սցենարներն անթույլատրելի են: Ռուսաստանը պատրաստ է Սիրիայում ներքին արյունահեղ հակամարտության դադարեցման համար համագործակցել գործընկերների հետ՝ հիմվելով 2012թ.-ի հունիսի 30-ի Ժնևի Կոմյունիկեի իրականացման հիման վրա»,-ընդգծվում է Ռուսաստանի ԱԳՆ-ի տարածած հայտարարության մեջ: