ՄՄ-ում ձևավորված պլատֆորմը մեր երկրի համար ստեղծում է ակնհայտ առավելություններ. Տիգրան Սարգսյան

Մաքսային միության տնտեսական տարածքը ցույց տվեց, որ այն պլատֆորմը, որն այնտեղ ձևավորվում է՝ շատ մոտ է Հայաստանի տնտեսական համակարգին և այն զարգացման աստիճանին, որն առկա է երկրի տնտեսության մեջ: Այդ մասին «Հայաստան-Մաքսային միություն. հնարավորություններ և մարտահրավերներ» ՀՀԿ տնտեսական երկրորդ համաժողովում հայտարարեց վարչապետ Տիգրան Սարգսյանը: «Մեր երկրի ապրանքերի և ծառայությունների մշակման աստիճանը ցույց է տալիս, որ մեր տնտեսությունն այսօր շատ ավելի մոտ է եվրասիական տնտեսական համակարգին և ՄՄ-ում ձևավորված պլատֆորմը մեզ համար ակնհայտորեն ստեղծում է հարաբերական առավելություններ՝ մեր տնտեսական առավելությունները դրսևորելու համար: Այն ռեժիմները, որոնք ձևավորվեցին ՄՄ-ի ներքո, տվեցին դրական արդյունքներ: Երկրորդ՝ ԵՄ-ի հետ հարաբերություններում ակնհայտորեն դրսևորվեցին այն ակնհայտ առավելությունները, որոնք առկա են ԵՄ-ում: Համաշխարհային ճգնաժամից հետո աշխարհում տեղի ունեցան լրջագույն փոփոխություններ, բյուրեղացան լրջագույն երևույթներ, որոնք մինչ ճգնաժամն ակնառու չէին: Ճգնաժամն առաջին հերթին ցույց տվեց ԵՄ-ի ուժեղ և թույլ կողմերը, ցույց տվեց, թե որն է այն առանցքը, որի շուրջ միավորված են պետությունները: Երկրորդ ուղղությունը, որը նույնպես բյուրեղացավ, դա եվրասիական տնտեսական տարածքում տեղի ունեցող զարգացումներն էին, այն որ մեր առջև ձևավորվեց Մաքսային միություն, որը ցույց տվեց իր դրական գործառույթները և առկա ներուժը»,- ասել է վարչապետը: Նրա խոսքով՝ այս զարգացումները պարտադրում էին մեզ՝ հստակեցնել մեր վերաբերմունքն այս երկու կարևորագույն ուղղություններին և Հայաստանը ելնելով իր շահերից՝ համադրելով բոլոր ուղղությունները որոշում կայացրեց անդամակցել եվրասիական ինտեգրացիոն գործընթացներին:

Միաժամանակ, վարչապետն ընդգծեց, որ Հայաստանը շարունակելու է իր առանցքային գործընկերների հետ հարաբերությունների և շահերի համադրումը և այս քաղաքական կարևորագույն սկզբունքի ներքո էլ Հայաստանը դիտարկում է իր հարաբերությունները ԵՄ-ի և ՄՄ-ի հետ՝ որպես փոխլրացնող հարաբերություններ, որը բխում են ՀՀ-ի շահերից: ՀՀ վարչապետը մեջբերեց մեր երկրի նախագահի խոսքերը, որոնք հնչել են ԵԽԽՎ-ում: «Այս օրերին հաճախ է խոսվում է ԵՄ Արևելյան գործընկերության պետությունների քաղաքակրթական ընտրության մասին: ՀՀ նախագահը հայտարարել էր, որ Հայաստանը նպատակադրված շարունակելու է համակողմանի փոխշահավետ համագործակցությունը ԵՄ-ի հետ: «Արևելյան գործընկերության հենց սկզբից, մենք ասել ենք, որ ձգտում ենք հնարավորին սերտ հարաբերություններ ունենալ ԵՄ-ի հետ, այս քաղաքականությունը չի ընդատվելու: Միաժամանակ, հայտնի է, որ Հայաստանը չի կառուցել նոր հարաբերություններ՝ ի հաշիվ իր դաշնակից երկրների հետ հարաբերությունների»,-մեջբերեց ՀՀ վարչապետը:

Մարտի 29-ին Երևանում մեկնարկեց «Հայաստան-Մաքսային Միություն. հնարավորություններ և մարտահրավերներ» խորագրով ՀՀԿ երկրորդ տնտեսական համաժողովը։ Մասնակիցներին ուղերձներ են հղել ՀՀ նախագահ Սերժ Սարգսյանը, ՌԴ վարչապետ Դմիտրի Մեդվեդեւը: Համաժողովին զեկույցով հանդես է եկել նաեւ ԵՏՀ կոլեգիայի անդամ Տատյանա Վալովայան: Նախատեսվում են ՀՀ ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանի, ՀՀ ֆինանսների նախարար Դավիթ Սարգսյանի, ՀՀ էկոնոմիկայի նախարարի առաջին տեղակալ Կարինե Մինասյանի, ՀՀ արտաքին գործերի նախարարի տեղակալ Շավարշ Քոչարյանի, պաշտոնատար այլ անձանց ելույթները: