Մաքսային միությանը Հայաստանի անդամակցության որևէ խոչընդոտ գոյություն չունի. ՀՀ վարչապետ

Գոյություն չունի որևէ խոչընդոտ, որ կարող է հնարավորություն չտալ Հայաստանին անդամակցելու Մաքսային միությանը: Հայաստանի Հանրապետական կուսակցության «Հայաստան. Մաքսային Միություն. հնարավորություններ և մարտահրավերներ» խորագրով երկրորդ տնտեսական համաժողովի ժամանակ ՀՀ վարչապետ Տիգրան Սարգսյանն ասաց, որ նախորդ տարվա սեպտեմբերի 3-ից հետո իրականացվել է հսկայական աշխատանք և կողմերին մնացել է լուծելու մի քանի խնդիր: Վարչապետը նշեց, որ դեռևս չեն ավարտվել բանակցությունները Հայաստանի տնտեսության համար զգայուն համարվող 900 ապրանքատեսակների վերաբերյալ: Վարչապետի խոսքով` մասնավոր հատվածի հետ հանդիպումների և քննարկումների ժամանակ է կազմվել ապրանքների, հումքի ծառայությունների ցանկը, որոնք կարող են զգայուն լինել Հայաստանի համար: Տիգրան Սարգսյանի փոխանցմամբ' ընթացող բանակցությունների նպատակն է նվազեցնել ռիսկերը:

Մաքսային միությանն անդամակցության համար շարունակվում են բանակցությունները իրավական դաշտի ձևավորման շուրջ: Դաշտի ձևավորումը կբերի պայմանագրի ստորագրման: «Ենթակառուցվածքների ձևավորման շուրջ նույնպես ընթանում են աշխատանքներ, որպեսզի տնտեսական սուբյեկտներն առանց խոչընդոտների կարողանան իրացնել իրավունքները շուկայում»,-ասաց վարչապետը:

Հայաստանի Հանրապետական կուսակցության «Հայաստան. Մաքսային Միություն. հնարավորություններ և մարտահրավերներ» խորագրով երկրորդ տնտեսական համաժողովը մեկ հարկի տակ է մեկտեղել տնտեսական փորձագետների, քաղաքական տարբեր ուժերի ներկայացուցիչների, հյուրերի Եվրասիական տնտեսական հանձնաժողովի կոլեգիալ մարմնից: Համաժողովին զեկույցներ են ներկայացրել ՀՀ վարչապետ Տիգրան Սարգսյանը, ԵՏՀ կոլեգիայի անդամ Տատյանա Վալովայան, նախատեսվում են ՀՀ ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանի, ՀՀ ֆինանսների նախարար Դավիթ Սարգսյանի, ՀՀ էկոնոմիկայի նախարարի առաջին տեղակալ Կարինե Մինասյանի, ՀՀ արտաքին գործերի նախարարի տեղակալ Շավարշ Քոչարյանի, պաշտոնատար այլ անձանց զեկույցները: