Ո՞ր քաղաքացիական նախաձեռնությունն է արդյունավետ գործում. հարցում

Լուրեր.com կայքը անցկացնում է հարցում՝ «Ո՞ր քաղաքացիական նախաձեռնությունն է արդյունավետ գործում» հարցադրմամբ։

Մեր ընթերցողին առաջարկում ենք կայքի «Հարցում» բաժնում ընտրել նշված 4 քաղաքացիական նախաձեռնություններից մեկը.

1. «Բանակն իրականում». քաղաքացիական նախաձեռնությունն իր գործունեությունը ծավալել է 2011 թվականի օգոստոսի 26-ից, երբ տարածվեց ԼՂՀ զորամասերից մեկում 18-ամյա Աղասի Աբրահամյանի մահվան մասին լուրը, չնայած մինչև այդ ևս նախաձեռնության մի շարք ակտիվիստներ զբաղվել են բանակում մարդու իրավունքների հիմնախնդիրներով: Աղասի Աբրահամյանի' խոշտանգումներով սպանության մասին լուրը և լուսանկարները մեծ աղմուկ բարձրացրին Facebook սոցիալական ցանցում' հիմք հանդիսանալով նոր և լայնամասշտաբ քաղաքացիական ըմբոստության: Նախաձեռնությունը նպատակադրված է վերջ տալ հայկական բանակում տիրող հանցագործ բարքերին, բռնություններին, քրեադատավարական կեղծիքին և հանցագործների հովանավորչությանը, այսպիսով' ամբողջությամբ արմատախիլ անելով բանակում տիրող ոչ կանոնադրական բարքերը: Նախաձեռնությունն իրավասու մարմիններից պահանջում է իրականացնել արդար դատաքննություն' արդեն կատարված դեպքերով և խստորեն պատժել մեղավորներին:

2. «Փրկե՛նք Թեղուտը». շարժումը մեկնարկել է 2007 թվականի նոյեմբերին, թեև 2006 թվականից ի վեր Էկոլոգիական հասարակական կազմակերպությունների դաշինքը զբաղվում էր Թեղուտի անտառի պաշտպանությամբ: Նախաձեռնության նպատակն է կասեցնել Թեղուտի պղինձ-մոլիբդենային հանքավայրի շահագործման ծրագիրը: Ներկայումս այս նախաձեռնությունը վերափոխվում է ավելի ընդարձակ և համակողմանի էկոլոգիական շարժման:

3. «Մե՛նք ենք այս քաղաքի տերը». շարժումը սկսվել է Facebook սոցիալական ցանցում։ Խմբի նպատակն է օգտագործել բոլոր իրավական միջոցներն ու հասարակական կարծիքի արտահայտման ձևերը՝ կանաչ տարածքները ոչնչացնողներին հասարակական և իրավական պատասխանատվության ենթարկելու և Երևանի զբոսայգիները պաշտպանելու համար:

4. «Մենք դեմ ենք օտարալեզու դպրոցների վերաբացմանը». քաղաքացիական նախաձեռնությունը ստեղծվել է 2010 թվականի ապրիլին մի խումբ ակտիվիստների կողմից' որպես դիմադրություն Լեզվի մասին և Հանրակրթության մասին ՀՀ օրենքների փոփոխություններին: Նախաձեռնությունը կտրականապես մերժում է ՀՀ Կառավարության կողմից Ազգային Ժողով ներկայացված «Լեզվի մասին» և «Հանրակրթության մասին» օրենքներում փոփոխություններ կատարելու նախագիծը, որով նախատեսվում է Հայաստանում բացել օտարալեզու դպրոցներ: Նախաձեռնությունը պահանջում է և առաջարկում է, որ Կառավարությունը հետ կանչի այդ վտանգավոր օրինագիծը, ստեղծվեն օրենսդրական երաշխիքներ ապագայում նմանօրինակ նախաձեռնությունները բացառելու համար, օրինագիծը կասեցնելուց հետո կազմակերպել հասարակական քննարկումներ լեզվի և հանրակրթության խնդիրների շուրջ: